Taldyqorǵan qalasynda voleiboldan áielderdiń Ulttyq liga komandalary arasyndaǵy QR HHH chempionaty márege jetti, dep habarlaidy QazAqparat.
Plei-off básekelerinde altyn júldeni «Altai» (Óskemen) men «Jetisý» (Taldyqorǵan) komandalary sarapqa saldy.
Ótken jyly da qos klýb finalda kezdesip, serbiialyq maman Marko Grshich jattyqtyratyn óskemendikter jeńimpaz atanǵan edi. Budan keiin «Jetisý» klýbynda túrkiialyq maman Janbolat Býrhannyń ornyna belgili voleibolshy Elena Pavlova kelgen bolatyn.
Biyl qos finaldyq oiynda da «Altaidyń» mereii ústem boldy. Búgingi matchta óskemendikter 25:19, 25:16, 25:18 esebimen utyp, qarsylasyna des bermedi. Komanda kapitany, Oral voleibolynyń túlegi Sana Anarqulovaǵa qosa ýkrainalyq Nadejda Kodola, serbiialyq bailanystyrýshy Danitsa Radenkovich, sondai-aq qazaqstandyqtar Polina Ýfimtseva, Kristina Belova, Kristina Anikonova, libero Mádina Beket jeńiske súbeli úlesterin qosty.
Osylaisha «Altai» alty dúrkin el chempiony atandy.
«Jetisý» kúmispen kúptelse, soltústikqazaqstandyq «Qýanysh» eki jyl qatarynan qola júldege ie boldy.
Saltanatty rásimde úzdik oiynshylar da marapattaldy.
