Italiialyq Vogue sán jýrnalynyń bas redaktory Emanýel Farneti óziniń Instagram paraqshasynda jýrnaldyń kelesi sany aq muqabamen shyǵatyny týraly post jariialady. Ol aq tústi «qurmet, jańarý jáne únsizdik» belgisi retinde tańdaǵanyn atap ótti. Bul týraly "Ult aqparat" Dailymail basylymyna silteme jasap habarlaidy.
Jýrnaldy aq muqabamen shyǵarý týraly ideia shyǵarmashylyq direktory Ferdinando Verderige tiesili.
Emanýel Farneti kóp ýaqyt jumys istegen jobalardy keiinge ysyryp qoiǵanyn málim etti. Onyń aitýynsha, jýrnaldyń baǵyty shynaiy ómirden alystamaýy kerek.
Ol Instagram paraqshasynda aq muqabamen jaryq kórgen jýrnaldyń sýretimen bólisip, «Vogue Italia-nyń sáýirdegi shyǵarylymy 10-y, iaǵni juma kúni jaryq kóredi» dep jazdy.
Aq tústi neliktegen tańdaǵanyn ol bylaisha túsindirdi: «Tolyǵymen aq muqaba shyǵarý ideianyń joqtyǵyn bildirmeidi. Aq tús kóp maǵyna beredi. Aq – birinshiden, qurmet belgisi. Aq – jańǵyrý, qarańǵydan keiingi jaryqty, barlyq tústiń qosyndysyn bildiredi. Aq – biz úshin óz ómirlerin qaterge tigip júrgen adamdardyń biryńǵai formasynyń túsi».
Nómirde karantin kezindegi sán taqyryby qozǵalady. Nómirdi shyǵarý úshin 40-tan astam qyzmetshi (fotograftar, sánqoilar, stilister, kreativti direktorlar, vizajister) jumys istegen. Olar ózine, otbasy múshelerine nemese dostaryna internet arqyly sán úlgisin kórsetý úshin jeke kollektsiiasyndaǵy kiimderdi paidalanǵan.
