Resei Ýkrainaǵa basyp kirgen soń elden ketken Vladivostok qalalyq dýmasynyń depýtaty Viktor Kamenshikov áleýmettik jelide AQSh-tan saiasi baspana alǵanyn málimdedi. Ol kóshi-qon túrmesinen bosap shyqqan. Aitýynsha, qazir Maiamide (Florida shtaty), dep habarlaidy Azattyq.
19 mamyrda Kamenshikov Meksika men AQSh shekarasynda ustalǵan. Ol shekarany zańsyz kesip ótti degen kúdikke ilingen. Budan soń AQSh-tan saiasi baspana suraǵan.
AQSh biligi ázirge Kamenshikovtiń málimdemesine túsinikteme bermedi. Resei federatsiiasy kommýnistik partiiasynyń Primore ólkesi boiynsha hatshysy, aimaqtyq parlament fraktsiiasynyń jetekshisi Anatolii Dolgachev Kamenshikovti "partiianyń bedeline nuqsan keltirdi" dep aiyptap, ony "satqyn" dep atady.
Aqpan aiynda Ýkrainadaǵy soǵysqa qarsy ekenin málimdegen depýtat qalalyq dýma otyrysyna sodan beri qatyspaǵan. 27 aqpanda ol partiiadan shyǵý týraly ótinish bergen.
Ol Ýkrainadaǵy separatistik qurylymdar – "LHR" men "DHR"-diń táýelsizdigin moiyndap, Reseidiń Ýkrainaǵa basyp kirýin qoldaǵan partiia basshylyǵymen kelispeitinin bildirgen.
Naýryz basynda Sibir.Realii basylymyna bergen suhbatynda Kamenshikov "Qazirdiń ózinde jurt Reseiden qashyp jatyr. Alaida pikirińdi aitpai qashý – bul okkýpant statýsynda qashý degendi bildiredi. Sondyqtan eger adam qazir pikirin aitpasa, qarsy ekenin bildirmese, demek ol ony qoldaidy degen sóz" dep málimdegen edi.
