Resei Memlekettik Dýmasynyń tóraǵasy Viacheslav Volodin belgili saiasatker, LDPR partiiasynyń jetekshisi Vladimir Jirinovskiidiń qaitys bolǵanyn habarlady.
"Aýyr jáne uzaqqa sozylǵan aýrýdan Vladimir Volfovich Jirinovskii qaitys boldy", - dep jazdy Volodin Telegram-arnasyna.
Aita keteiik, budan buryn, iaǵni 25 naýryzda Jirinovskiidiń qaitys bolǵany týraly habar taraǵan bolatyn. Sol kezde Memlekettik Dýmasynyń basshysy ony joqqa shyǵarǵan.
Reseilik saiasatker aqpan aiynyń basynda Máskeýdiń Ortalyq klinikalyq aýrýhanasyna ekijaqty pnevmoniiamen túsken edi. Dárigerler saiasatkerge "ókpesiniń 75 paiyzy zaqymdanǵan" degen diagnoz qoiǵan. Birneshe kúnnen keiin onyń jaǵdaiy nasharlap, aýyr dep baǵalandy. Keiin jasandy tynys alý appartyna qosylǵan.
Dertti koronavirýstyń omikron shtamy qozdyryp jibergen.
Jirinovskii 1946 jyly 25 sáýirde Almaty qalasynda dúniege kelgen. Sol jerde Dzerjinskii atyndaǵy 25 orta mektepti támamdaǵan.
Al 1964 jyly Lomonosov atyndaǵy Máskeý memlekettik ýniversitetine shyǵys tilderi institýtyna túsken. Túrik tili men ádebietin oqydy. Budan bólek, marksizm-leninizm ýniversitetinde halyqaralyq qatynastar fakýltetinde bilim aldy. Ákesi – Volf Eidelshtein. Biraq Vladimir ýniversitetke túserdiń aldynda anasynyń birinshi kúieýinen qalǵan familiiasyn aldy.
1988 jyly saiasi mansabyn bastady. Sol jyly Demokratiialyq odaqtyń sezine qatysyp, sóz sóiledi. Sóitip, quryltaishylardyń kózine túsip, ortalyq úilestirý keńesiniń quramyna sailandy. Biraq kóp uzamai, partiia qatarynan shyǵyp ketti.
1989 jyly Vladimir Bogachevpen birge Keńes odaǵynyń liberaldy-demokratiialyq partiiasyn qurdy. Al 1991 jyly RSFSR prezidenti sailaýynda úmitker boldy. KSRO-nyń ydyraýyna qarsy miting ótkizdi. Eki jyldan keiin Resei Federatsiiasynyń memlekettik dýmasyna depýtat bolyp sailandy.
1996 jyly taǵy prezidenttikke óz kandidatýrasyn usyndy. Jalpy, Jirinovskii alty ret prezident sailaýyna tústi. Biraq eshqashan 10 paiyzdan artyq daýys jinamady.
Reseilik saiasatker Qazaqstanǵa qatysty málimdemeleri úshin talai ret synǵa ushyraǵan.
