Resei Prezidenti Vladimir Pýtin Elbasy Nursultan Nazarbaevqa Qazaqstan Prezidentiniń alǵashqy jalpyhalyqtyq sailaýyndaǵy jeńisiniń 30 jyldyǵymen quttyqtap, jedelhat joldady. Jedelhat mátini Kreml saitynda jariialandy, dep habarlaidy QazAqparat.
«Qurmetti, Nursultan Ábishuly! Qazaqstan Respýblikasy Prezidentiniń birinshi jalpyhalyqtyq sailaýyndaǵy jeńisińizdiń 30 jyldyǵyna – ataýly dataǵa orai shyn júrekten quttyqtaýymdy qabyl alyńyz. Sizdiń memleket basshysy bolǵan jyldaryńyz qazirgi zamanǵy qazaqstandyq memlekettik qalyptasý kezeńine ainaldy. Sizdiń basshylyǵyńyzben respýblika ekonomikalyq, áleýmettik, ǵylymi-tehnikalyq jáne basqa da salalarda tamasha jetistikterge qol jetkizdi. Álemdik arenada joǵary bedelge ie boldy. Sizdiń reseilik-qazaqstandyq strategiialyq seriktestik jáne odaqtastyq qarym-qatynasty qalyptastyrýǵa ári damytýǵa, sonymen qatar postkeńestik keńistiktegi ózara tiimdi integratsiialyq protsessterdi, EýrazES, UQShU, TMD, ShYU jáne ózge de kópjaqty qurylymdar aiasyndaǵy syndarly yntymaqtastyqty jolǵa qoiýǵa qosqan jeke úlesińizdi baǵalaý óte qiyn. Sizdiń boiyńyzdaǵy memleket qairatkeriniń mol tájiribesi, jan-jaqty bilim, saiasi danalyq pen kóregendilik Qazaqstanǵa da, halyqaralyq isterde aldaǵy ýaqytta da qajet bola beretindigine kúmán keltirmeimin. Bizdiń adal qarym-qatynasymyzdy shynaiy baǵalaimyn jáne dostyq bailanysymyzdyń jalǵasatyndyǵyna senemin. Sizge zor densaýlyq, uzaq ǵumyr, baqyt, jan sergektigi men tabystar tileimin! Qurmetpen, Vladimir Pýtin», - delingen jedelhatta.
