Pavlodar oblysy politsiia departamentiniń bastyǵy qyzmetine Vasilii Skliar taǵaiyndaldy, dep habarlady Sputnik Qazaqstan vedomstvonyń baspasóz qyzmetine silteme jasap.
Buǵan deiin departamentti UQK-nyń burynǵy basshysy Kárim Másimovtyń týysy – politsiia general-maiory Nurlan Másimov basqarǵan. Kárim Másimov qamaýǵa alyndy. Al Nurlan Másimov 17 qańtarda jazǵan ótinishi negizinde qyzmetinen bosatylǵan bolatyn.
Deparatmenttiń jańa basshysy Ishki ister ministriniń buiryǵymen taǵaiyndaldy. Onyń kandidatýrasyna Prezident Ákimshiligi kelisim bergen. Búgin Ishki ister ministri Erlan Turǵymbaev jeke quramǵa politsiia departamentiniń jańa bastyǵyn tanystyrdy.
Vasilii Vasilevich Skliar 1983 jyly dúniege kelgen. Buqaralyq aqparat quraldarynyń málimetine sáikes, Vasilii Skliar - Qazaqstannyń vitse-premeri Roman Skliardyń týǵan inisi.
2006 jyly QR IIM Qaraǵandy zań institýtyn, 2012 jyly QR IIM Qaraǵandy akademiiasynyń magistratýrasyn bitirgen. Zańger, quqyq magistri.
Túrli laýazymdarda, sonyń ishinde Pavlodar qalasynyń ýchaskelik politsiia inspektory; qylmystardy ashý jónindegi jedel ýákil; asa mańyzdy ister jónindegi aǵa jedel ýákil; Soltústik Qazaqstan oblysy politsiia departamentiniń kriminaldyq politsiia basqarmasy bastyǵynyń orynbasary bolyp jumys istedi.
2017 jyldyń sáýirinde Pavlodar oblysy Aqsý qalasynyń IIB bastyǵy bolyp taǵaiyndaldy. Buǵan deiin Ekibastuz qalasynyń politsiia basqarmasyn basqardy.
