Qazaqstanda 2018 jyly engiziletin jańa formattaǵy áleýmettik kómek kórsetýge daiyndyq barysymen tanysý úshin óńirge eńbek jáne halyqty áleýmettik qorǵaý vitse-ministri Svetlana Jaqypova keldi, dep habarlaidy otyrar.kz tilshisi.
Oblystyq ákimdikte ótken májiliste osynaý másele jan-jaqty talqylandy. Onda tiisti kómek kórsetetin sala qyzmetkerleri men mekemelerdiń ázirligi pysyqtaldy.
Aldaǵy jyl áleýmettik sala qyzmetkerleri úshin syndarly jyl bolǵaly tur. Jańartylǵan júiede usynylatyn áleýmettik kómek kórsetýge mamandar men tiisti mekemeler saqadai sai daiyn bolýy tiis. Sala basshysynyń sózine sensek, osynaý kómekke muqtajdar sany kelesi jyly 300 myńǵa jýyqtap otyr. Olardyń 74 myńy shartsyz, 222 myńy shartty áleýmettik kómekpen qamtylady dep kútilýde.
Osynaý qyzmetti júzege asyrý úshin tiisti daiyndyqtardy qalt jibermei qadaǵalap otyrǵan sala basshysy mamandardyń biliktiktiligin de arttyryp, halyqqa túsindirý jumystaryn da myqtap qolǵa aldyq dep otyr.
Aita keteiik, biyl kúngeide «Órleý» jobasyn iske asyrý úshin 22 myńnan asa otbasy shartty aqshalai kómekpen jáne 27 myń turǵyndy jumyspen qamtý josparlanǵan bolatyn. Eger byltyr oblystaǵy osynaý jobaǵa qatysýshylardyń sany 26 paiyzdy qurasa, biyl josparlanǵan kórsetkish edáýir artqan. Osynaý pilottyq jobany sátti iske asyrǵan áriptesterine tánti bolǵan vitse-ministr hanym bul joly da úlken senimin artty.
Atqarylyp jatqan jumys barysymen etene tanysý úshin Svetlana Jaqypova áleýmettik mekemelerdi aralyp kórdi. Solardyń biri — jýyrda ǵana ashylǵan Shymkenttegi №1 arnaýly áleýmettik qyzmet kórsetý ortalyǵynyń qosymsha 110 oryndy ǵimaraty. Munda 18 jastan asqan psiho-nevrologiialyq aýrýlary bar I jáne II toptaǵy azamattar arnaýly áleýmettik qyzmettermen qamtamasyz etiledi.
Osylaisha mekemelerdegi júieli jumystardy kózben kórip qaitqan vitse-ministr 2018 jyly iske asatyn jańa formattaǵy áleýmettik kómektiń kópshilik úshin qoljetimdi bolatynyna kóz jetkizip qaitty.
Ult portaly
