QR Parlamenti Senatynda Balalar men jasóspirimder sporttyq mektebindegi bapkerlerdiń tómen jalaqysy máselesi kóterildi, dep habarlaidy "Ult aqparat".
«Mektep oqýshylary sporttyq úiirmelerge barýy úshin abonementterge Bilim jáne ǵylym ministrliginen qarajat bólý josparlanýda. Bul arqyly elimizde tegin úiirmelerdiń joq ekenin memlekettiń ózi rastap otyrǵan sekildi. Al BǴM esepterinen tegin úiirmelerdiń bar ekenin oqimyz. Ekinshiden, bul ataýly áleýmettik kómek sekildi dúrligý týǵyzbai ma? Kimge, ne úshin, qai sanatqa, qansha berýimiz kerek degen suraqtar týyndaidy», - dep surady Senat depýtaty Serik Bekturǵanov Áleýmettik-mádeni damý jáne ǵylym komitetiniń keńeitilgen otyrysynda.
Mektep oqýshylarynyń sporttyq abonementteri boiynsha QR Mádeniet jáne sport vitse-ministri Eldos Ramazanov Bilim jáne ǵylym ministrligimen tyǵyz jumys istep jatqandaryn jetkizdi.
«Ázirge Berdibek Saparbaevtyń (QR Premer-Ministriniń orynbasary – red.) tapsyrmasymen sporttyq zaldardyń, sporttyq infraqurylymnyń qoljetimdiligi jóninde Bilim jáne ǵylym ministrligimen kelisim bekitildi. Mektep oqýshylaryna arnalǵan abonementter boiynsha, óńirlerdi aralap júrmiz. Úiirmelik sabaq úshin dene tárbiesi pániniń muǵalimine qosymsha aqy tóleý máselesi bar. Buryn bazalyq qyzmettik jalaqynyń 45% tólenetin. Qazir bul qosymsha aqyny alyp tastady jáne óz isine shyn berilgen muǵalimder ǵana qaldy. Sondyqtan, buqaralyq sport týraly zań jobasynda osy máseleni kótergimiz keledi», - dep jaýap berdi E. Ramazanov.
Sonymen birge, vitse-ministr Balalar men jasóspirimder sporttyq mektebindegi bapkerlerdiń qansha jalaqy alatynyn aitty.
«Balalar men jasóspirimder sporttyq mektebindegi bapkerler shamamen 40 myń teńge eńbekaqy alady. Eger jalaqyny kóterý amaldaryn oilastyrmasaq, aldaǵy eki jylda rezerv qalmai qalady», - dedi Eldos Ramazanov.
