قر پارلامەنتٸ سەناتىندا بالالار مەن جاسٶسپٸرٸمدەر سپورتتىق مەكتەبٸندەگٸ باپكەرلەردٸڭ تٶمەن جالاقىسى مەسەلەسٸ كٶتەرٸلدٸ, دەپ حابارلايدى "ۇلت اقپارات".
«مەكتەپ وقۋشىلارى سپورتتىق ٷيٸرمەلەرگە بارۋى ٷشٸن ابونەمەنتتەرگە بٸلٸم جەنە عىلىم مينيسترلٸگٸنەن قاراجات بٶلۋ جوسپارلانۋدا. بۇل ارقىلى ەلٸمٸزدە تەگٸن ٷيٸرمەلەردٸڭ جوق ەكەنٸن مەملەكەتتٸڭ ٶزٸ راستاپ وتىرعان سەكٸلدٸ. ال بعم ەسەپتەرٸنەن تەگٸن ٷيٸرمەلەردٸڭ بار ەكەنٸن وقيمىز. ەكٸنشٸدەن, بۇل اتاۋلى ەلەۋمەتتٸك كٶمەك سەكٸلدٸ دٷرلٸگۋ تۋعىزباي ما? كٸمگە, نە ٷشٸن, قاي ساناتقا, قانشا بەرۋٸمٸز كەرەك دەگەن سۇراقتار تۋىندايدى», - دەپ سۇرادى سەنات دەپۋتاتى سەرٸك بەكتۇرعانوۆ ەلەۋمەتتٸك-مەدەني دامۋ جەنە عىلىم كوميتەتٸنٸڭ كەڭەيتٸلگەن وتىرىسىندا.
مەكتەپ وقۋشىلارىنىڭ سپورتتىق ابونەمەنتتەرٸ بويىنشا قر مەدەنيەت جەنە سپورت ۆيتسە-مينيسترٸ ەلدوس رامازانوۆ بٸلٸم جەنە عىلىم مينيسترلٸگٸمەن تىعىز جۇمىس ٸستەپ جاتقاندارىن جەتكٸزدٸ.
«ەزٸرگە بەردٸبەك ساپارباەۆتىڭ (قر پرەمەر-مينيسترٸنٸڭ ورىنباسارى – رەد.) تاپسىرماسىمەن سپورتتىق زالداردىڭ, سپورتتىق ينفراقۇرىلىمنىڭ قولجەتٸمدٸلٸگٸ جٶنٸندە بٸلٸم جەنە عىلىم مينيسترلٸگٸمەن كەلٸسٸم بەكٸتٸلدٸ. مەكتەپ وقۋشىلارىنا ارنالعان ابونەمەنتتەر بويىنشا, ٶڭٸرلەردٸ ارالاپ جٷرمٸز. ٷيٸرمەلٸك ساباق ٷشٸن دەنە تەربيەسٸ پەنٸنٸڭ مۇعالٸمٸنە قوسىمشا اقى تٶلەۋ مەسەلەسٸ بار. بۇرىن بازالىق قىزمەتتٸك جالاقىنىڭ 45% تٶلەنەتٸن. قازٸر بۇل قوسىمشا اقىنى الىپ تاستادى جەنە ٶز ٸسٸنە شىن بەرٸلگەن مۇعالٸمدەر عانا قالدى. سوندىقتان, بۇقارالىق سپورت تۋرالى زاڭ جوباسىندا وسى مەسەلەنٸ كٶتەرگٸمٸز كەلەدٸ», - دەپ جاۋاپ بەردٸ ە. رامازانوۆ.
سونىمەن بٸرگە, ۆيتسە-مينيستر بالالار مەن جاسٶسپٸرٸمدەر سپورتتىق مەكتەبٸندەگٸ باپكەرلەردٸڭ قانشا جالاقى الاتىنىن ايتتى.
«بالالار مەن جاسٶسپٸرٸمدەر سپورتتىق مەكتەبٸندەگٸ باپكەرلەر شامامەن 40 مىڭ تەڭگە ەڭبەكاقى الادى. ەگەر جالاقىنى كٶتەرۋ امالدارىن ويلاستىرماساق, الداعى ەكٸ جىلدا رەزەرۆ قالماي قالادى», - دەدٸ ەلدوس رامازانوۆ.
