QR Bilim jáne ǵylym vitse-ministri Qýanysh Erǵaliev elimizde Resei ýniversitetteri filialdaryn ashýǵa qatysty syni pikirlerge jaýap berdi, - dep habarlaidy Tengrinews.kz.
Qýanysh Erǵaliev Facebook-tegi paraqshasynda eldegi Resei ýniversitetteriniń filialdaryn ashýǵa qatysty qoǵamda qate kózqaras qalyptastyratyn destrýktivti sipattaǵy birjaqty pikirlerge tap bolyp jatqanyn aitty.
"Men buǵan deiin bilim berý sektoryn jaqsartý boiynsha Qazaqstan men RF arasyndaǵy seriktestiktiń birqatar negizgi qaǵidattaryn túsindirip ótkenmin. Osyǵan bailanysty kózqarasymmen birqatar tolyqtyrýlardy jetkizgim kelip otyr:
Birinshiden, strategiialyq seriktestik, eń aldymen, eki tarap úshin de ózara tiimdi ortaq maqsattar men múddelerge qol jetkizýge baǵyttalǵan. Ótken kúnderi Memleket basshysynyń jumys sapary aiasynda qazaqstandyq delegatsiia quramynda Máskeýge baryp qaittym. Sapar barysynda reseilik áriptestermen birqatar mańyzdy kelisimge qol jetkizip, sonyń ishinde QR Bilim jáne ǵylym ministrligi men RF ǵylym jáne joǵary bilim ministrligi arasyndaǵy ózara túsinistik týraly Memorandýmǵa qol qoiyldy. Memorandým QR aýmaǵyndaǵy jetekshi reseilik joǵary oqý oryndarynyń filialdaryn ashýdy, sondai-aq, óz kezeginde Reseide de qazaqstandyq JOO ókildikterin teń negizde ashýdy kózdeidi, bul eki tarap úshin de tepe-teń quqyqtar men ortaq jaǵdailardy týǵyzady.
Ekinshiden, memleket tarapynan bilim berý qyzmetin litsenziialaý erejelerine sáikes barlyq standarttar men sapa deńgeii saqtalady. Iaǵni, QR aýmaǵynda filialdardy ashqan kezde reseilik joǵary oqý oryndary maman daiarlaý jónindegi qazaqstandyq litsenziialaý erejelerin eskere otyryp, qos litsenziialaý kózdeletin bolady. Bul eki eldiń ózara múddeleri eskeriletin ekijaqty tiimdi yntymaqtastyqtyń aiqyn kórinisi.
Úshinshiden, men buǵan deiin de injenerlik-tehnikalyq beiindegi joǵary bilikti kadrlardyń qajettiligin eskere otyryp, Qazaqstandaǵy jetekshi reseilik joǵary oqý oryndarynyń filialdar jelisin keńeitý jáne Reseide "Bolashaq" baǵdarlamasy Centre for International Programmes - Bolashaq boiynsha mamandar daiarlaý josparlanǵanyn jazǵan edim. Alaida, bul bizdiń stýdentter álemniń jetekshi oqý oryndarynda oqi almaidy degen sóz emes. Qazaqstandyq stýdentter reseilik JOO qosa, álemniń 27 eliniń 200-den astam ýniversitetterinde úzdik bilim alý múmkindigine ie. Iaǵni bizdiń stýdentter úshin RF ýniversitetteri JOO tańdaý kezinde qosymsha balama sanalady.
Tórtinshiden, injenerlik damýdyń qalyptasý kezeńinde Resei álemdegi jetekshi injenerlik derjavalardyń úshtigine kirdi. Barlyǵymyz tarihtan uzaq ýaqyt boiy Keńes Odaǵynyń, sodan keiin Reseidiń aeroǵarysh, zymyran, iadrolyq fizika jáne injeneriia salasyndaǵy kóshbasshy bolǵanynyna kýá boldyq. Tipti, búkil dúniejúzi úshin spýtnik adamzattyń jańa ári ǵaryshty jaýlap alý dáýiriniń aiqyn beinesi boldy. Búgingi tańda reseilik mamandardyń tehnologiialyq jetistikteri artyp keledi. Tiisinshe, Reseilik oqý oryndarynda kadrlar daiarlaý batystyq bilim deńgeiinen esh kem túspeidi dep bilemin.
Besinshiden, Resei ýniversitetterinde alǵan bilim shetelde joǵary baǵalanady. Óz tájiribemnen aitar bolsam, AQSh-ta oqyp júrgenimde, men irgeli bilimniń arqasynda magistratýra jáne PhD baǵdarlamalary boiynsha oqýyn sátti jalǵastyryp júrgen kóptegen reseilik túlekterdi kezdestirdim. Batys ýniversitetteri Reseilik stýdentterdiń negizgi bilimin baǵalaitynyna birneshe ret nazar aýdardym, iaǵni bul alǵan bilimniń básekege qabilettiliginiń taǵy bir dáleli. Sondai-aq, Resei ýniversitetteriniń diplomdary álemniń kóptegen elinde rastaýdy qajet etpeidi.
Jalpy, reseilik ýniversitetterdiń filialdaryn ashý bilim berý naryǵyna da, otandyq ýniversitetterdiń damýyna da jańa serpin ákeleri sózsiz. Jergilikti ýniversitetter bilim berý sapasyn jaqsartýǵa umtyla otyryp, básekelestikti kúsheitip, halyqaralyq ýniversitetterden qalys qalmai, infraqurylymdy damytýǵa investitsiia quiady", - dep jazdy vitse-ministr.
