Bilim jáne ǵylym vitse-ministri Sholpan Qarinova mektep muǵaliminiń mártebesi zańmen qalai qorǵalatynyn aityp berdi, dep habarlaidy QazAqparat.
«Qazaqstanda jeltoqsan aiynda qabyldanǵan «Pedagogtar mártebesi týraly» zań men ákimshilik rásimder týraly kodekske engizilgen ózgerister negizinde 2020 jyldyń 31 naýryzynda buiryq qabyldandy. Bul buiryq bilim berý júiesinde tekserý júrgizý boiynsha táýekel dárejesin qarap, ólshem sharttary men tekserý paraqtaryn bekitýdi kózdeidi. Iaǵni, muǵalimderden tiisti emes jumystardy talap etken jaǵdaida ákimshilik aiyppul salý kózdelgen», - dedi Sholpan Qarinova Bilim jáne ǵylym ministrliginiń onlain rejimde ótken apparattyq otyrysynda.
Vitse-ministr bul rette aýmaqtyq departamentter naqty qandai jaǵdaida muǵalimderdi mindetinen tys jumysqa tartqandarǵa aiyppul salynatynyn aityp berdi.
«Naqty aityp otyrǵan buiryqqa bailanysty óńirlerdegi departamentterge quziretine 1 sáýirden bastap berilip, jumys bastaldy. Munyń ishine pedagogtardan eseptilik nemese ózine bailanysta emes aqparattardy suratqandar, muǵalimderdi óziniń, iaǵni kásibi mamandyǵymen bailanysty emes jumystarǵa tartqandar, pedagogtardy taýarlar men qyzmetterdi satyp alýǵa mindettep, memlekettik bilim mekemelerindegi qyzmetkerlerdi basqa memlekettik emes uiymdardyń is-sharalaryn ótkizýge tartatyndar jaýapkershilik arqalaidy», - dedi vitse-ministr.
Eske salsaq, buǵan deiin QR Bilim jáne ǵylym ministri Ashat Aimaǵambetov balabaqsha, mektep pen kolledjde qaǵazbastylyqtan arylatyn kún kelgenin málim etken bolatyn.
