QR Aqparat jáne qoǵamdyq damý vitse-ministri Marat Ázilhanov ministrliktiń janynan qurylǵan etnosaralyq qatynastardy damytý jónindegi komitetiniń jumysy týraly aityp berdi, dep habarlaidy QazAqparat.
«Memleket basshysy Joldaýda ekonomikalyq jáne áleýmettik taqyryptarǵa toqtaldy. Joldaýdaǵy basty baǵyttardyń biri, árine, eldegi turaqtylyqty saqtaý. Joldaýda aitylǵan memlekettik basqarýdyń jańa modelin qurý qajettiligi, kadrlyq saiasat, sheshim qabyldaý júiesi jáne olardy júzege asyrýda jaýapkershilikpen qaraý máselesi kezdeisoq kóterilgen joq», - dedi Marat Ázilhanov.
Sonymen qatar, ol Memleket basshysynyń tapsyrmasymen etnosaralyq qatynastar salasyndaǵy memlekettik saiasat tiimdiligin arttyrý boiynsha birqatar sharalar qabyldanǵanyn atap ótti
«Alǵash ret QR Aqparat jáne qoǵamdyq damý ministrligi janynan Etnosaralyq qatynastardy damytý komiteti quryldy. Komitet - tikelei etnosaralyq saladaǵy saiasatty ázirleýmen ainalysady. Onyń basty mindeti – ortalyqtaǵy jáne jergilikti jerlerdegi etnosaralyq úderisterdi basqarý júiesin jetildirý. Sondai-aq, Komitet etnosaralyq qatynastar salasyndaǵy memleket saiasatyn damytý jónindegi máselelerdi zerdeleidi, usynystar ázirleidi jáne qajetti ádistemelik, aqparattyq jumystardy júzege asyrady. Qazirgi ýaqytta óńirlik deńgeide etnosaralyq qatynastardy damytý máseleleri boiynsha ákimdikterdiń ishki saiasat basqarmalarynyń quramynda jeke qurylymdyq bólimsheler qurylýda. Sonymen qatar, aldaǵy ýaqytta Etnosaralyq ahýaldy baqylaityn aqparattyq júie qurý máselesi pysyqtalýda. Aimaqtardaǵy QHA hatshylyqtary men «Qoǵamdyq kelisim» KMM qoǵamdyq damý ishki saiasat basqarmalaryna berilip, óńirlik assambleialar tóraǵalarynyń orynbasarlary ishki saiasat salasyna jetekshilik etetin ákim orynbasarlary bolyp taǵaiyndalýda»,– dedi QR Aqparat jáne qoǵamdyq damý vitse-ministri.
Onyń aitýynsha, qazirdiń ózinde Etnosaralyq qatynastardy damytý komiteti memlekettik saiasatty belsendi nasihattap keledi.
