Ákim laýazymyna kandidatýrany aýyl turǵyndarynyń ózderi usyna alady. Bul týraly Ulttyq ekonomika vitse-ministri Álisher Ábdiqadyrov aitty, dep habarlaidy primeminister.kz.
Ulttyq ekonomika vitse-ministri Álisher Ábdiqadyrovtyń aitýynsha, 800 aýyl ákimin tikelei sailaý osy jyldyń ekinshi jartyjyldyǵynda, qazirgi ákimderdiń ókilettik merzimi shyqqan kezde ótedi. Óz kandidatýrasyn aýyl turǵyndarynyń ózderi de, óz músheleriniń arasynan tirkelgen saiasi partiialar da usyna alady.
Sondai-aq, aýyl ákimdigine kandidattar bolmaǵan ne usyný merzimi aiaqtalǵan kezde bir ǵana kandidat usynylǵan jaǵdaida, aýdan (oblystyq mańyzy bar qala) ákiminiń jergilikti qaýymdastyq jinalysynyń kelisimi boiynsha eki kandidatqa deiin sailaýǵa qatysýdy qamtamasyz ete otyryp, kandidattardy nemese óz kandidatyn usynýǵa quqyǵy bar.
«Aýyl ákimderiniń ókilettik merzimine keler bolsaq, ol ózgerissiz qalady jáne 4 jyldy quraidy», — dep tolyqtyrdy ulttyq ekonomika vitse-ministri.
Aýyl ákimderiniń tikelei sailaýyn qarjylandyrý jergilikti biýdjet arqyly júzege asyrylady. 2021-2022 jyldarǵa arnalǵan jalpy sipattaǵy transfertterdiń qoldanylý kezeńinde sailaýdy qarjylandyrý OSK arqyly respýblikalyq biýdjetten nysanaly transferttermen júzege asyrylatyn bolady. 2023 jyldan bastap bul shyǵystar jergilikti biýdjetterdiń shyǵystar bazasyna engiziledi jáne jalpy sipattaǵy transfertterdi esepteý kezinde eskeriletin bolady. Jergilikti biýdjetterge toqtalyp ótsek. Qazaqstanda 2018 jyldan bastap aýyldyq okrýgter deńgeiinde derbes biýdjet engizildi, ol biýdjettiń tórtinshi deńgeii retinde aiqyndaldy. Jergilikti ózin-ózi basqarý biýdjeti berilgen salyqtyń 6 túri esebinen qurylady.
«Jergilikti biýdjetterdi engizý kezeń-kezeńmen júrgizildi. 2018 jyldan bastap halqynyń sany 2000 adamnan asatyn ákimshilik-aýmaqtyq birlikterde, al bul shamamen aýdandyq mańyzy bar 1052 qalada, aýyldarda, kentterde jáne aýyldyq okrýgterde, al 2020 jyldan bastap – barlyq jerde. Sonyń nátijesinde 2345 aýyldyq okrýg derbes biýdjet aldy», — dedi Á. Ábdiqadyrov.
Jergilikti ózin-ózi basqarý biýdjetiniń kiris kózderin odan ári keńeitý maqsatynda biýdjet zańnamasyna tólemderdiń taǵy 4 túrin jergilikti ózin-ózi basqarý deńgeiine berýdi kózdeitin túzetýler ázirlendi.
