OQO-daǵy balany zorlaý faktisi boiynsha pikir bildirgende biz tek sol óńirdegi bilim departamentiniń málimetterine súiendik. Bul jóninde QR Bilim jáne ǵylym vitse-ministri Bibigúl Asylova málimdedi, dep habarlaidy Baq.kz aqparat tilshisi.
«Bul jaǵdai týraly málimet alǵan sátten bastap bizdegi Balalar quqyǵyn qorǵaý komiteti bul aqparatqa monitoring jasap, jergilikti bilim basqarmasymen bailanys júrgizip otyr. Seisenbi kúni aitylǵan málimetter aldyn ala málimet bolatyn jáne sol óńirdegi bilim basqarmasynyń bergen deregine súiendik. Qazirgi ýaqytta bizdiń komitet ókilderi Ońtústik Qazaqstan oblysyna jol júrdi», - degen vitse-ministr qoǵam men Balalar quqyǵy jónindegi ókildiń osy oqiǵaǵa qatysty belsendilik tanytqany úshin alǵys bildirdi.
Jýrnalisterdiń eger, balaǵa qatysty zorlyq faktisi rastalsa, mektep direktoryna qandai jaza qoldanylatyn jónindegi suraǵyna B.Asylova bul bilim jáne ǵylym ministrliginiń quzyretinde emes ekenin aitty.
«Qazirgi ýaqytta qandai da bir naqty sheshim shyǵarý erte. Arnaiy saraptamalar men tekserýler júrgizilgennen keiin, biz de barlyq múddeli memlekettik organdarmen birlesip óz ustanymyz jaiynda málimdeme jasaityn bolamyz. Al mektep direktoryna qatysty aitar bolsam, eger, bul fakti dáleldense, onda bul tusta endi basqa zańdar, iaǵni qylmystyq, ákimshilik zań buzýshylyqty qarastyratyn zańdar iske qosylady dep sanaimyn. Ol qylmysqa qatystylyǵy, qylmys deńgeiine qatysty quqyq qorǵaý organdary belgili shara qoldanatyn bolady.
Mektep direktory, oqý isiniń meńgerýshisi, psiholog, árbir muǵalim, árbir qyzmetkerge qatysty, onyń qylmysqa qanshalyqty qatysty, qanshalyqty yqpal etti, onyń qanshalyqty kináli ekeni de belgilengen tártipte zańmen qaralýy kerek. Sondyqtan, qazir mynaý kináli dep kesip aitý erte. Biz bilim jáne ǵylym ministrligimiz. Sondyqtan, saraptamanyń durys ne burystyǵy jaiynda esh pikir bildire almaimyz. Biz tek sol bilim departamentiniń aldyn ala málimetterine súiendik», - dedi BǴM ókili.
