Búgin Astanada ótken baspasóz máslihatynda QR Bilim jáne ǵylym vitse-ministri Ashat Aimaǵambetov 25 balmen grantqa ótkender týraly aitty, dep habarlaidy QazAqparat.
«25 balmen grantqa ótkenderge toqtalsaq, keibireýleri kolledjdi bitirgennen keiin oqýǵa túsýge qujat tapsyrady. Bul rette qysqa merzimge 3 jyl oqityndar jatady. Mysaly, mektepti támamdaǵan túlekter UBT tapsyrǵanda joǵary ball 140 bolsa, eń tómengi shekti ball 50-ge teń. Al kolledjden keiingi túlekter tek 70 suraqqa jaýap beredi, iaǵni eki pándi ǵana tańdaidy. Sáikesinshe, olarda shekti ball 25-ke teń. Biyl «Atamekenniń» jáne kolledjderdiń usynysymen biraz granttardyń sanyn kolledjden keiingi túlekterge berdik. Biraq kolledjden keiingi granttarǵa kóp suranys bolǵan joq, sondyqtan osy mamandyqtar boiynsha olar shekti baldy ala turyp, grantty ielenip jatty. Kóbinese, olar tehnikalyq mamandyqtarǵa tiesili. Kolledj bitirgennen keiin 3 jyl oqidy», - dedi vitse-ministr
«Jalpy, kolledjderdi qoldaýymyz kerek. Osy oqý oryndaryn támamdaǵan túlekter qysqa merzimde oqyp shyǵa alady. Sol úshin biyl biraz granttar bólindi», - dep naqtylady A. Aimaǵambetov.
Sonymen qatar, ol granttardy bólgen kezde elimizde tiisti kvotalar qarastyrylǵanyn eske salyp ótti. Bul turǵyda ata-analarynyń qamqorlyǵynsyz qalǵan balalarǵa, Qazaqstannyń azamaty emes ulty qazaq adamdar úshin bólingen, sondai-aq aýyl jastaryna eskerilgen kvotalar bar.
Budan buryn habarlanǵandai, Qazaqstanda sheteldegi qandastarymyz 25 jáne 26 balmen grantqa tústi.
