بٷگٸن استانادا ٶتكەن باسپاسٶز مەسليحاتىندا قر بٸلٸم جەنە عىلىم ۆيتسە-مينيسترٸ اسحات ايماعامبەتوۆ 25 بالمەن گرانتقا ٶتكەندەر تۋرالى ايتتى, دەپ حابارلايدى قازاقپارات.
«25 بالمەن گرانتقا ٶتكەندەرگە توقتالساق, كەيبٸرەۋلەرٸ كوللەدجدٸ بٸتٸرگەننەن كەيٸن وقۋعا تٷسۋگە قۇجات تاپسىرادى. بۇل رەتتە قىسقا مەرزٸمگە 3 جىل وقيتىندار جاتادى. مىسالى, مەكتەپتٸ تەمامداعان تٷلەكتەر ۇبت تاپسىرعاندا جوعارى بالل 140 بولسا, ەڭ تٶمەنگٸ شەكتٸ بالل 50-گە تەڭ. ال كوللەدجدەن كەيٸنگٸ تٷلەكتەر تەك 70 سۇراققا جاۋاپ بەرەدٸ, ياعني ەكٸ پەندٸ عانا تاڭدايدى. سەيكەسٸنشە, ولاردا شەكتٸ بالل 25-كە تەڭ. بيىل «اتامەكەننٸڭ» جەنە كوللەدجدەردٸڭ ۇسىنىسىمەن بٸراز گرانتتاردىڭ سانىن كوللەدجدەن كەيٸنگٸ تٷلەكتەرگە بەردٸك. بٸراق كوللەدجدەن كەيٸنگٸ گرانتتارعا كٶپ سۇرانىس بولعان جوق, سوندىقتان وسى ماماندىقتار بويىنشا ولار شەكتٸ بالدى الا تۇرىپ, گرانتتى يەلەنٸپ جاتتى. كٶبٸنەسە, ولار تەحنيكالىق ماماندىقتارعا تيەسٸلٸ. كوللەدج بٸتٸرگەننەن كەيٸن 3 جىل وقيدى», - دەدٸ ۆيتسە-مينيستر
«جالپى, كوللەدجدەردٸ قولداۋىمىز كەرەك. وسى وقۋ ورىندارىن تەمامداعان تٷلەكتەر قىسقا مەرزٸمدە وقىپ شىعا الادى. سول ٷشٸن بيىل بٸراز گرانتتار بٶلٸندٸ», - دەپ ناقتىلادى ا. ايماعامبەتوۆ.
سونىمەن قاتار, ول گرانتتاردى بٶلگەن كەزدە ەلٸمٸزدە تيٸستٸ كۆوتالار قاراستىرىلعانىن ەسكە سالىپ ٶتتٸ. بۇل تۇرعىدا اتا-انالارىنىڭ قامقورلىعىنسىز قالعان بالالارعا, قازاقستاننىڭ ازاماتى ەمەس ۇلتى قازاق ادامدار ٷشٸن بٶلٸنگەن, سونداي-اق اۋىل جاستارىنا ەسكەرٸلگەن كۆوتالار بار.
بۇدان بۇرىن حابارلانعانداي, قازاقستاندا شەتەلدەگٸ قانداستارىمىز 25 جەنە 26 بالمەن گرانتقا تٷستٸ.
