Kemerovo oblysynyń birinshi vitse-gýbernatory Vladimir Chernov 27 naýryzda Kemerovoda órt sebepterin shynaiy jáne ashyq tergep, kinálilerdi jaýapqa tartýdy talap etken stihiialy mitingti "biliktiń bedelin túsirýdi kózdegen, uiymdastyrylǵan aktsiia" dep málimdedi. Bul týraly Azattyq radiosy habarlaidy.
"Ol jerde ne bolyp jatqanyn túsinbeitin qyzba jastar kóp boldy" dedi Chernov. Vitse-gýbernator sonymen qatar oblys gýbernatory Aman Tóleevtiń mitingige jinalǵan júzdegen adamnyń aldyna shyqpaǵanyn "durys" dep atady.
Keshe oblystyq ákimdikte Resei prezidenti Vladimir Pýtin qatysqan jiynda Tóleev qaiǵyly oqiǵa úshin Pýtinnen keshirim surap, mitingige qatysýshylardy "shataq shyǵarýshylar" dep ataǵan. Onyń pikirinshe, mitingige jinalǵandar arasynda "órt qurbandarynyń týystary bolmaǵan".
Alańǵa shyǵyp, mitingige qatysýshylarmen sóilesken vitse-gýbernator Sergei Tsivilev mitingide sóilegen Igor Vostrikovti "piarmen ainalysyp júr" dep aiyptaǵan. Vostrikov oǵan órtten kishkentai úsh qyzy men áieli jáne ápkesi qaza tapqanyn aitqan. Budan soń Tsivilev qurbandardyń týystary aldynda tizesin búgip keshirim suraǵan.
Sońǵy málimet boiynsha, Kemerovoda 25 naýryzda "Zimniaia vishnia" saýda jáne oiyn-saýyq ortalyǵynda bolǵan órtten 64 adam qaza tapty. Onyń kópshiligi - balalar. Resei tótenshe jaǵdai ministrligi órtten iz-túzsiz joǵalǵandar týraly málimet joǵyn málimdedi. Keshe qala ákimdigi jariialaǵan tizimde 38 adam, onyń ishinde 26 bala iz-túzsiz joǵaldy dep sanalǵan.
28 naýryz Reseide órt qurbandaryn ulttyq aza tutý kúni dep jariialandy. Kemervoda búgin órtten qaza tapqan 14 adamdy jerlep jatyr.
