Reseilik tanymal ánshi Vitastyń prodiýseri Qytai telearnasyna hat jazyp, Dimash Qudaibergenov oryndaǵan «Opera 2» áni úshin narazylyq bildirdi. Bul týraly Qytaidyń áleýmettik jelileri jazyp jatyr, dep habarlaidy QazAqparat.
Vitastyń prodiýseri Sergei Pýdovkinniń «Vibo» (qytailyq tvitter) áleýmettik jelisindegi paraqshasynda «Pýdovkin» prodiýserlik ortalyǵynyń Hýnan telearnasyna jazǵan hatyn jariialady. Onda atalmysh telearnanyń avtorlyq quqyq zańnamalaryn saqtamaǵandyǵy aitylǵan.
«Opera 2» - reseilik tanymal ánshi Vitalii Gogýnskiidiń avtorlyq áni. Áýeni de, sózi de Vitasqa tiesili. Ol 2000 jyly bul ándi tuńǵysh ret oryndap, tanymal boldy. Vitastyń barlyq ánderiniń quqyǵy «Pýdovkin» prodiýserlik ortalyǵynyń menshiginde. Hýnan telearnasy uiymdastyrǵan «Singer2017» án baiqaýynda qazaqstandyq ánshi Dimash Qudaibergenov 28 qańtar kúni «Opera 2» ánin oryndap, bul telearna arqyly keńinen taraldy. Budan bólek (Dimashtyń áni) ár túrli saittarda keńinen júktelip, paidalanylýda. Sonymen birge 30 qańtar kúni bul án «búkil álemdik Qytaidyń kóktem merekesinde» taǵy oryndalyp, telearna, internet arqyly taǵy taraldy. Vitas ánderi álemniń kóp elderinde taralǵanymen paidalanýda jergilikti organdar arqyly zańdyq quqyq qorǵalady. Bul joly Hýnan telearnasy «Pýdovkin» prodiýserlik ortalyǵynyń zańdyq múddesine zalal keltirdi», delingen hatta.
Sonymen birge Vitastyń prodiýserlik ortalyǵy atalmysh telearnaǵa mynadai talaptaryn joldaǵan:
1. Hatty alǵan soń, 30 qańtar kúni «búkil álemdik Qytaidyń kóktem merekesinde» aitylǵan «Opera 2» ániniń taralýyn toqtatý.
2. Zańdy jolmen ruqsat alynbaǵan jaǵdaida «Opera 2» ánin aitýǵa, paidalanýǵa bolmaidy.
3. Osy hatty alǵannan soń, 7 kún ishinde bizben habarlasyp, ortaq sheshimge kelý. Hat sońynda «Pýdovkin» prodiýserlik ortalyǵynyń Hýnan telearnasymen kelisimshart jasaýǵa daiyn ekendigi aitylǵan.
