Búginde epidemiologiialyq ahýal kúrdeli óńir – Almatyǵa Qytaidan meditsina mamandary keldi. Sheteldik sarapshylar koronavirýspen kúreste tájiribe bólisedi, dep habarlaidy QazAqparat.
Búgin pýlmonologiia, epidemiologiia, qoǵamdyq densaýlyq saqtaý salasynyń 10 bilikti mamany Sanjar Asfendiiarov atyndaǵy qazaq ulttyq meditsinalyq ýniversitetiniń ujymymen, Almaty ákimdiginiń ókilderimen, QR DSM ókilderimen video kezdesý ótkizdi.
Onlain rejimde ótken kezdesý barysynda ýniversitet basshysy Talǵat Nurǵojin qytailyq dárigerlerge tájiribesimen bóliskeni úshin alǵys bildirdi.
«Biz Qytailyq áriptesterimizdiń kelgenine qýanyshtymyz. Sizderdiń tájiribelerińiz bizdiń eldegi dertpen kúreske septigin tigizedi dep senemiz. Sizderden álde de diagnostika men emdeý týraly maǵlumat bilgimiz keledi», - dedi Talǵat Nurǵojin.
Jiyn barysynda qalalyq Qoǵamdyq densaýlyqsaqtaý basqarmasynyń basshysy Tileýhan Ábildaev qaladaǵy epidemiologiialyq ahýaldy baiandap berdi.
«Qazir Almatyda koronavirýstyń 525 jaǵdaiy tirkelgen. 100 myń adamǵa shaqqanda kórsetkish 25,6% bolyptur.
Bailanysta bolǵandardyń 90%-nan virýs tabyldy. 85 adam jazylyp shyqqan. Bul aýyrǵandardyń shamamen 16,6%-y bolyp tur. Birinshi jaǵdai tirkelgeli beri Almatyda juǵý deńgeii 2-58 % aralyǵynda bolyp tur. Kópshiligi 13,14 sáýir kúnderi anyqtalǵan. Aýrý kórsetkishi tolqyndy túrde kórinis berip keledi. Almatyda 6 zerthanada PTsR tásilimen diagnostika jasalyp jatyr. Olar kúnine 1500 zerthanalyq taldaý jasai alady. Qalada infektsiialyq statsionarlarda 800 tósek oryn bar. Qazir olardyń 54 %-y ǵana tolǵan. 5 adam qaitys bolsa, 85 adam jazylyp shyqty. Onyń 4-i bala», - dedi Tileýhan Ábildaev.
Qytaidan kelgen meditsina mamandary Almaty dárigerleriniń koronavirýspen kúres deńgeiin óte joǵary baǵalady.
Olar diagnostika men emdeý salasynyń qai oblystarynda jumysty kúsheitýge keńes berdi.
«Aldymen bailanysta bolǵan adamdardy tap basyp anyqtaý kerek. Diagnostikalyq múmkindikti kúsheitý kerek. Almatyda juqtyrǵan adamdardyń teń jartysy meditsina mamandary eken. Olardy qorǵanys sharalaryna úiretý kerek», - dedi qytailyq mamandar.
«Áriptesterimniń pikirimen kelisem. Bas sanitarlyq dárigerdiń tapsyrmasymen qaladaǵy barlyq meditsinalyq mekemeler provizorlyq rejimge kóshedi. Barlyq meditsina mamandary jeke qorǵanys quraldarymen qamtylatyn bolady. Sonymen qatar, QR Qorǵanys ministrliginiń gospitalderin qosqanda tósek oryndy 1000 – ǵa jetkize alamyz. Sonymen qatar 280 orynǵa arnalǵan modýldi gospital salynyp jatyr. Zerthanalarda taldaý múmkindigin kúnine 3000 testke jetkize alady», - dedi basqarma basshysy T.Ábildaev.
Qytailyq mamandar videokonferentsiia sońynda qazaqstandyqtarǵa virýsty jeńip shyǵýǵa tilek bildirdi.
«Virýs shekarany bilmeidi. Virýspen kúreste bizdiń dostyǵymyz aiqyndala túspek», - dedi sheteldikter.
