Virýs jyldam tarap jatqan Braziliia naýqastar sany jaǵynan Reseiden ozyp, ekinshi orynǵa shyqty. Dúniejúzilik densaýlyq saqtaý uiymy Ońtústik Amerikany pandemiianyń "jańa oshaǵy" dep atady.
Braziliiada 330 890 adamnan koronavirýs anyqtalǵan, 21 048 adam qaitys bolǵan. Sarapshylar naýqastar budan da kóp bolýy múmkin dep boljaidy. Qazir Latyn Amerika eli indettiń taralý aýqymy jaǵynan AQSh-tan keiin ekinshi orynda tur. Munda birneshe kún ishinde myńnan astam adam qaitys bolǵan. Adam ólimi jaǵynan álemde 6-shy orynda tur.
DDSU-nyń tótenshe jaǵdai jónindegi direktory Maik Raian "kóptegen elde jaǵdai turaqty emes, biraq dál qazir Braziliia indetten qatty zardap shegip jatyr" dedi.
Latyn Amerika elderi arasynda Meksika 22 mamyrda bir kúnde 479 adamnyń koronavirýstan qaitys bolǵanyn habarlady.
Djons Hopkins ýniversitetiniń málimetinshe, AQSh-ta 1,6 mln adamǵa virýs juqqan, 96 myń adam qaitys bolǵan. Resei 326 myńnan astam adamǵa virýs juqqanyn, 3200 adam qaitys bolǵanyn habarlady.
Qytai alǵash ret koronavirýs tirkelmegenin málimdedi. Ońtústik Koreiada 23 adamnan koronavirýs tabylǵan.
