Almaty qalasynyń burynǵy ákimi Viktor Hrapýnovqa 17 jyl bas bostandyǵynan aiyrý jazasy taǵaiyndaldy, dep habarlaidy QazAqparat tilshisi.
«Viktor Hrapýnov jasaǵan qylmystary úshin kináli dep tanylyp, oǵan múlkin tárkileýmen birge maksimaldy qaýipsizdigi bar qylmystyq-atqarý júiesinde 17 jyl bas bostandyǵynan aiyrý jazasy belgilengen. Sondai-aq, ol Ulttyq bank, qarjy mekemeleri, memlekettik uiymdar men basqa da mekemelerde qyzmet atqarý quqyǵynan aiyryldy», - dedi sot úkimin oqyǵan sýdia.
Sonymen qatar, V.Hrapýnov barlyq marapattary men ordenderinen aiyryldy.
Almaty qalasy eks-ákiminiń zaiyby Leila Hrapýnova 14 jylǵa bas bostandyǵynan aiyryldy, al kúieý balasy Aiiar Iliiasov 5 jylǵa sottaldy.
Qazaqstannan 2017 jyly ketken aiyptalýshylarǵa qatysty sońǵy sot protsesi syrttai ótti.
Hrapýnovtar isi boiynsha 200-den astam kýáger bolǵan, is materialdary 400 tomnan quralǵan.
Sot qaraýyndaǵy bas figýranttardan basqa, bul is boiynsha erli-zaiyptylarmen birge jumys istegen taǵy 9 adam ótti.
Eske sala keteiik, erli-zaiypty Hrapýnovtar memlekettik múlikti urlaý, alaiaqtyq jasaý, qyzmettik ókildikterin asyra paidalaný, para alý jáne urlaǵan múlikti zańdastyrý boiynsha aiyptalyp otyr. Memleketke keltirilgen shyǵyn kólemi 250 million dollardan asqan. Taiaýda sot otyrysy kezinde prokýror qylmyskerlerge 20 jyl jaza taǵaiyndaýdy suraǵan bolatyn.
