الماتى قالاسىنىڭ بۇرىنعى ەكٸمٸ ۆيكتور حراپۋنوۆقا 17 جىل باس بوستاندىعىنان ايىرۋ جازاسى تاعايىندالدى, دەپ حابارلايدى قازاقپارات تٸلشٸسٸ.
«ۆيكتور حراپۋنوۆ جاساعان قىلمىستارى ٷشٸن كٸنەلٸ دەپ تانىلىپ, وعان مٷلكٸن تەركٸلەۋمەن بٸرگە ماكسيمالدى قاۋٸپسٸزدٸگٸ بار قىلمىستىق-اتقارۋ جٷيەسٸندە 17 جىل باس بوستاندىعىنان ايىرۋ جازاسى بەلگٸلەنگەن. سونداي-اق, ول ۇلتتىق بانك, قارجى مەكەمەلەرٸ, مەملەكەتتٸك ۇيىمدار مەن باسقا دا مەكەمەلەردە قىزمەت اتقارۋ قۇقىعىنان ايىرىلدى», - دەدٸ سوت ٷكٸمٸن وقىعان سۋديا.
سونىمەن قاتار, ۆ.حراپۋنوۆ بارلىق ماراپاتتارى مەن وردەندەرٸنەن ايىرىلدى.
الماتى قالاسى ەكس-ەكٸمٸنٸڭ زايىبى لەيلا حراپۋنوۆا 14 جىلعا باس بوستاندىعىنان ايىرىلدى, ال كٷيەۋ بالاسى اييار ٸليياسوۆ 5 جىلعا سوتتالدى.
قازاقستاننان 2017 جىلى كەتكەن ايىپتالۋشىلارعا قاتىستى سوڭعى سوت پروتسەسٸ سىرتتاي ٶتتٸ.
حراپۋنوۆتار ٸسٸ بويىنشا 200-دەن استام كۋەگەر بولعان, ٸس ماتەريالدارى 400 تومنان قۇرالعان.
سوت قاراۋىنداعى باس فيگۋرانتتاردان باسقا, بۇل ٸس بويىنشا ەرلٸ-زايىپتىلارمەن بٸرگە جۇمىس ٸستەگەن تاعى 9 ادام ٶتتٸ.
ەسكە سالا كەتەيٸك, ەرلٸ-زايىپتى حراپۋنوۆتار مەملەكەتتٸك مٷلٸكتٸ ۇرلاۋ, الاياقتىق جاساۋ, قىزمەتتٸك ٶكٸلدٸكتەرٸن اسىرا پايدالانۋ, پارا الۋ جەنە ۇرلاعان مٷلٸكتٸ زاڭداستىرۋ بويىنشا ايىپتالىپ وتىر. مەملەكەتكە كەلتٸرٸلگەن شىعىن كٶلەمٸ 250 ميلليون دوللاردان اسقان. تاياۋدا سوت وتىرىسى كەزٸندە پروكۋرور قىلمىسكەرلەرگە 20 جىل جازا تاعايىنداۋدى سۇراعان بولاتىن.
