Qazaqstanda veipterdiń baǵasy kóteriledi. Bul týraly Ulttyq ekonomika ministri Álibek Qýantyrov aitty, dep habarlaidy Sputnik Qazaqstan.
Búgin Májiliste salyq kodeksine ózgerister men tolyqtyrýlar engizý máselesi qaraldy. Depýtattar zań jobasyn birinshi oqylymda maquldady. Sonyń aiasynda temekige ǵana emes, veipterge de aktsizdiń baǵasyn kóterý josparlanyp otyr.
"Qazirgi kezde sigaretter men qyzdyrylatyn temekiniń aktsizderi differentsialdy túrde, shamamen, 10 protsenke ósip keledi. Bizdiń maqsatymyz – ony eýropalyq deńgeige jetkizý. Biraq depýtattar tarapynan qosymsha usynystar tústi. Osy zań jobasyn talqylaý barysynda aktsizdiń mólsherlemeleri taǵy kóterilýi múmkin", - dedi Qýantyrov jalpy otyrystan keiingi brifingte.
Ministrdiń aitýynsha, búginde temekini qyzdyratyn quraldardy jaspóspirimder jii paidalanady. Al Dúniejúzilik densaýlyq saqtaý uiymynyń qorytyndysyna sáikes, ondai quraldardyń qaýpi sigaretpen birdei.
"Demek, veipterdiń adam densaýlyǵyna tigizetin áseri temekimen teńestirilip otyr. Osyǵan bailanysty biz depýtattardyń usynysyn eskere otyryp, aktsizderdiń mólsherin kóterý máselesin qarastyryp shyǵamyz", - dep atap kórsetti Qýantyrov.
Aita keteri, Májilistiń búgingi otyrysynda depýtaty Edil Jańbyrshin veipterge tolyǵymen tyiym salýdy usyndy. Al Ulttyq ekonomika ministri Álibek Qýantyrovtyń aitýynsha, "veipterge tyiym salynsa, adam densaýlyǵyna qaýipti basqa da taýarlarǵa tyiym salý máselesi týyndaidy". Sondyqtan osy máseleni ekonomikalyq jolmen sheshý kerek. Veipter qymbat bolsa, ony alatyn adamdar da azaiady.
