Vetnamǵa qonys aýdarý úshin barǵan qazaqstandyq juptyń qol júginde bolǵan 3 400 dollary ushyp kelgennen keiin joǵalyp ketken. Olar aqshany Tbilisi – Almaty – Danang baǵyty boiynsha Air Astana reisterimen alyp ushqan, dep habarlaidy ult.kz.
Bul týraly Anna Magneli Instagram paraqshasynda video jariialady.
Onyń aitýynsha, aqsha konvertte bolǵan jáne qol júgi búkil sapar boiy ózderinde bolǵan. Alaida Danangqa qonǵannan keiin apartamentke ornalasyp, konvertti ashqanda, ishindegi 3 400 dollardyń ornyna Malavi kvachasy salynǵanyn anyqtaǵan.
«Aqshany jai ǵana alyp ketpegen. Konvertti ashyp, 3 400 dollardy alyp, ornyna basqa banknottardy salyp ketken», – deidi ol.
Magnelidiń sózinshe, bul aqsha olardyń Vetnamǵa qonys aýdarǵannan keiingi alǵashqy ýaqytqa alǵan qarajaty bolǵan. Jup jinaǵan aqshasyn ádeii dollarǵa aiyrbastap, ózderimen birge alyp barǵan.
Qazir olar oqiǵanyń qai jerde jáne kimniń qatysýymen bolǵanyn anyqtaýǵa tyrysyp jatyr. Jup Air Astana áýe kompaniiasyna resmi túrde júginip, ótinishin tirkegen.
«Qazir kimniń kináli ekenin bilmeimiz, sondyqtan naqty eshkimdi aiyptap otyrǵan joqpyz», – dedi Anna.
Onyń aitýynsha, aqsha joǵalǵannan keiin olar qiyn jaǵdaiǵa tap bolǵan. Sebebi Vetnamdaǵy birneshe kúnge jalǵa alǵan apartamenttiń aqysy da áli tólenbegen.
Anna áleýmettik jeli qoldanýshylarynan aqsha suramaitynyn jáne qaiyrymdylyq jinaýdy josparlamaitynyn atap ótti. Onyń aitýynsha, qazirgi tańda olar úshin eń mańyzdysy – jaǵdaiǵa nazar aýdartý jáne aviakompaniia ókilderiniń olarmen bailanysyp, oqiǵany anyqtaýǵa kómektesýi.
Aita keteiik, qazirgi ýaqytta 3 400 dollardyń naqty qai jerde joǵalǵany jáne oǵan kimniń qatysy bary týraly resmi aqparat joq.
