Vetnamdaǵy eń bai áielderdiń biri alaiaqtyq jasaǵany úshin ólim jazasyna kesildi, dep habarlaidy "Ult aqparat" BBC-ge silteme jasap.
Hoshimin soty 67 jastaǵy vetnamdyq isker áiel Chyong Mi Landy 11 jyl boiy eldegi eń iri bankterdiń birin tonap kelgeni úshin ólim jazasyna kesti.
Van Thinh Phat kompaniiasynyń basshysy Chyong Mi Lan – Vetnamda qarjylyq qylmys jasaǵany úshin ólim jazasyna kesilgen sanaýly áielderdiń biri.
Mundai aýqymdaǵy alaiaqtyq buryn-sońdy bolmaǵan. Chyong Mi Lan Saigon Commercial Bank-ten 304 trln dong (shamamen 12,5 mlrd dollar) nesie alǵany úshin kináli dep tanyldy. Onyń alaiaqtyq áreketinen kelgen jalpy shyǵyn 27 mlrd dollarǵa baǵalanyp otyr. Sot úkimi ony dál osy somany qaitarýǵa mindettedi, al aiyptaýshy tarap bul múmkin emes dep esepteidi.
Sot Chyongqa qysym jasaý arqyly urlanǵan aqshanyń kem degende bir bóligin qaitarýǵa májbúrleý úshin ólim jazasyn taǵaiyndady degen pikir aityldy. Chyong Mi Lan kinásin moiyndamai, qylmysyn qaramaǵyndaǵylarǵa júktedi.
Lannyń otbasy músheleriniń biri Reuters agenttigine bergen suhbatynda onyń sot úkimine shaǵymdanatynyn aitqan. Áiel Hoshiminde turatyn Qytai-Vetnam otbasynan shyqqan. Úlken etnikalyq qytai qaýymdastyǵy turatyn bul qala uzaq ýaqyt boiy Vetnam ekonomikasynyń lokomotivine ainaldy.
Lan eń bastapqyda anasymen birge kosmetika satýmen ainalysqan. Biraq 1986 jyly kommýnistik partiianyń ekonomikalyq reformalary bastaǵannan keiin ol jer men jyljymaityn múlik satyp ala bastady. 1990 jyldary onyń ieliginde birneshe qonaqúiler men meiramhanalar bolǵan.
Vetnamdyq BAQ sot protsesin egjei-tegjeili habarlady. Aitýlarynsha, aiǵaq berýge 2700 adam shaqyrylyp, iske 10 memlekettik aiyptaýshy men 200-ge jýyq advokat qatysqan. Aiǵaqty zattar salmaǵy 6 tonna bolatyn 104 jáshikke salynǵan. Tyong Mai Lanmen birge taǵy 85 adam sotqa tartylyp, úkimin kútýde.
