ۆەتنامداعى ەڭ باي ەيەل الاياقتىق جاساعانى ٷشٸن ٶلٸم جازاسىنا كەسٸلدٸ

ۆەتنامداعى ەڭ باي ەيەلدەردٸڭ بٸرٸ الاياقتىق جاساعانى ٷشٸن ٶلٸم جازاسىنا كەسٸلدٸ, دەپ حابارلايدى "ۇلت اقپارات" BBC-گە سٸلتەمە جاساپ.

حوشيمين سوتى 67 جاستاعى ۆەتنامدىق ٸسكەر ەيەل چىونگ مي لاندى 11 جىل بويى ەلدەگٸ ەڭ ٸرٸ بانكتەردٸڭ بٸرٸن توناپ كەلگەنٸ ٷشٸن ٶلٸم جازاسىنا كەستٸ.

Van Thinh Phat كومپانيياسىنىڭ باسشىسى چىونگ مي لان – ۆەتنامدا قارجىلىق قىلمىس جاساعانى ٷشٸن ٶلٸم جازاسىنا كەسٸلگەن ساناۋلى ەيەلدەردٸڭ بٸرٸ.

مۇنداي اۋقىمداعى الاياقتىق بۇرىن-سوڭدى بولماعان. چىونگ مي لان Saigon Commercial Bank-تەن 304 ترلن دونگ (شامامەن 12,5 ملرد دوللار) نەسيە العانى ٷشٸن كٸنەلٸ دەپ تانىلدى. ونىڭ الاياقتىق ەرەكەتٸنەن كەلگەن جالپى شىعىن 27 ملرد دوللارعا باعالانىپ وتىر. سوت ٷكٸمٸ ونى دەل وسى سومانى قايتارۋعا مٸندەتتەدٸ, ال ايىپتاۋشى تاراپ بۇل مٷمكٸن ەمەس دەپ ەسەپتەيدٸ.

سوت چىونگقا قىسىم جاساۋ ارقىلى ۇرلانعان اقشانىڭ كەم دەگەندە بٸر بٶلٸگٸن قايتارۋعا مەجبٷرلەۋ ٷشٸن ٶلٸم جازاسىن تاعايىندادى دەگەن پٸكٸر ايتىلدى. چىونگ مي لان كٸنەسٸن مويىنداماي, قىلمىسىن قاراماعىنداعىلارعا جٷكتەدٸ.

لاننىڭ وتباسى مٷشەلەرٸنٸڭ بٸرٸ Reuters اگەنتتٸگٸنە بەرگەن سۇحباتىندا ونىڭ سوت ٷكٸمٸنە شاعىمداناتىنىن ايتقان. ەيەل حوشيميندە تۇراتىن قىتاي-ۆەتنام وتباسىنان شىققان. ٷلكەن ەتنيكالىق قىتاي قاۋىمداستىعى تۇراتىن بۇل قالا ۇزاق ۋاقىت بويى ۆەتنام ەكونوميكاسىنىڭ لوكوموتيۆٸنە اينالدى.

لان ەڭ باستاپقىدا اناسىمەن بٸرگە كوسمەتيكا ساتۋمەن اينالىسقان. بٸراق 1986 جىلى كوممۋنيستٸك پارتييانىڭ ەكونوميكالىق رەفورمالارى باستاعاننان كەيٸن ول جەر مەن جىلجىمايتىن مٷلٸك ساتىپ الا باستادى. 1990 جىلدارى ونىڭ يەلٸگٸندە بٸرنەشە قوناقٷيلەر مەن مەيرامحانالار بولعان.

ۆەتنامدىق باق سوت پروتسەسٸن ەگجەي-تەگجەيلٸ حابارلادى. ايتۋلارىنشا, ايعاق بەرۋگە 2700 ادام شاقىرىلىپ, ٸسكە 10 مەملەكەتتٸك ايىپتاۋشى مەن 200-گە جۋىق ادۆوكات قاتىسقان. ايعاقتى زاتتار سالماعى 6 توننا بولاتىن 104 جەشٸككە سالىنعان. تىونگ ماي لانمەن بٸرگە تاعى 85 ادام سوتقا تارتىلىپ, ٷكٸمٸن كٷتۋدە.