Vengriia men Qytai Býdapesht pen Belgrad arasyn jalǵaityn temir jol qurylysy jobasyn qarjylandyrý týraly kelisimge qol qoidy. 24 sáýirde qarjy ministri Mihali Varga aitqan Qytaimen kelisim jyldar boiy sozylyp kelgen jobany jalǵastyrýǵa múmkindik beredi.
Bul - Qytaidyń "Bir beldeý - bir jol" iri infraqurylymdyq jobasynyń bir bóligi, Eýroodaq aimaǵyndaǵy eń iri infraqurylym jobasy.
Varganyń aitýynsha, 20 jylǵa beriletin 1,855 mlrd dollar kólemindegi nesieniń jyldyq ústemaqysy - 2,5 paiyz. Joba shyǵynynyń basym bóligin nesie japqanmen biraz bóligin Vengriianyń ózi qarjylandyrady.
Temir jol Qytaiǵa Gretsiiadan Eýropanyń shyǵysyna taýar tasymaldaý maqsatyn júzege asyrýǵa kómektesedi dep aitylady.
Qytai, Serbiia jáne Vengriia alǵash ret 2014 jyly temir jol salý týraly memorandýmǵa qol qoiǵan. Serbiia Qytaidan 297,6 mln dollar qaryz alyp, 2018 jyly jobany bastaǵan.
Keibir sarapshylardyń pikirinshe, Qytai saiasi yqpalyn arttyrý úshin iri infraqurylym jobalardy qarjylandyryp, nesie usynady.
Derek boiynsha, 2007-2017 jyldar aralyǵynda Shyǵys Eýropa men Ortalyq Eýropa elderine salynǵan Qytai investitsiiasynyń kólemi 13,5 milliard dollarǵa jetken. Sarapshylar kishigirim elderdiń Qytai nesiesin alyp, qaryzǵa batýynyń qaýipti saldary bolýy múmkin dep sanaidy.
