Qazaqstan 2022 jyldyń səýir aiynda Venetsiia biennalesinde tuńǵysh resmi pavilonyn ashady, dep habarlaidy QazAqparat.
Venetsiia biennalesine Qazaqstan atynan ORTA transdistsiplinar ujymy qatysady. Ujym jobasy ataqty almatylyq sýretshi Sergei Kalmykovtyń (1891- 1967) ideialaryna negizdelgen.
Komanda quramynda aktrisa Aleksandra Morozova, rejisser Rústem Begenov, Daria Djýmelia, sýretshiler Aleksandr Baqanov pen Sabina Qýanǵalieva bar.
«Venetsiia biennalesindegi jeke ulttyq pavilon – qazaqstandyq art-sahnadaǵy kópten kútken oqiǵanyń biri. Qazaqstannyń Venetsiiadaǵy tuńǵysh pavilonynda komissar bolý – men úshin úlken mərtebe. Ónerdi birinshi kezekte kommýnikatsiia retinde qarastyrýǵa bolady, al Venetsiiadaǵy ulttyq pavilondar arqyly shartaraptyń daýsyn estýge, iaǵni bir kózqarasqa bailanyp qalmai, ýaqyt rýhyn seziný múmkindigi bar. Bul pavilon əlem boiynsha da, el ishinde de qazaqstandyq zamanaýi ónerdi qoldaýǵa jəne tanystyrýǵa arnalǵan kóptegen jobanyń birine ainalady dep úmittenemin», – deidi Qazaqstan pavilony komissary Merýert Qalieva.
Qazaqstan 2005-2013 jyldar aralyǵynda sharaǵa Ortalyq Aziia elderi pavilony aiasynda, al odan keiingi ýaqytta túrli mədeni institýtsiianyń óz betinshe uiymdastyrǵan bastamalary sheńberinde qatysyp keldi.
Biyl Qazaqstan tuńǵysh resmi ulttyq pavilonyn tanystyrady. Pavilondy Qazaqstannyń zamanaýi óner qory Ə.Qasteev atyndaǵy QR Memlekettik óner murajaiymen seriktestikte, «Səbi» qaiyrymdylyq qory, Nurlan Smaǵulov qory, G&G kompaniiasy, Marýsia Asaýbaeva qorynyń qoldaýymen jəne QR Mədeniet jəne sport ministrligi qatysýymen uiymdastyrmaq.
Venetsiia biennalesi – eń bedeldi halyqaralyq kórkemóner kórmeleriniń biri. Ol 1895 jyldan beri 2 jylda bir ret Venetsiiada uiymdastyrylyp keledi. Biennale – əlem óneriniń damý baǵytyn anyqtaityn oqiǵa. 59-biennale 2022 jyldyń 23 səýiri men 27 qarashasy aralyǵynda ótedi.
