AQSh-tyń memlekettik hatshysy Maik Pompeo Karakastaǵy elshilikten qyzmetkerlerin shyǵaratynyn aitty. Mundai sheshimge «Venesýeladaǵy jaǵdaidyń nasharlaýy» sebep bolǵan. Pompeo sonymen qatar elde amerikalyq diplomattardyń bolýy AQSh is-áreketterine shekteý ekenin jetkizdi.
Alaida, Venesýeladaǵy AQSh diplomattarynyń jumysy Vashingtonnyń syrtqy saiasatyna qalai kedergi keltiretinin Pompeo ashyq aitpaǵan.
«AQSh Karakastaǵy óz elshiligindegi barlyq qyzmetkerlerin osy aptada shyǵarady», dep málimdedi Memlekettik hatshy. Memlekettik departament muny seisenbi kúni habarlaǵan.
Pompeo, sondai-aq, qyzmetkerlerin shyǵarý jáne elshilik qyzmetkerleriniń azaitylýy týraly 24 qańtarda qabyldanǵan sheshimdi eske saldy. Memlekettik departament keiinnen shtattan tys shuǵyl áreket etetin qyzmetkerlerdi, sondai-aq Karakastaǵy elshilerdiń otbasylaryn qaitaryp alý týraly buiryq bergen.
23 qańtarda Venesýela oppozitsiiasynyń jetekshisi Hýan Gýaido ózin Venesýela prezidenti mindetin atqarýshy dep jariialaǵan bolatyn. AQSh, Latyn Amerikasy elderi jáne Eýropadaǵy keibir amerikalyq odaqtastar ony ýaqytsha memleket basshysy dep tanydy.
Al Resei men Qytai Nikolas Madýrony zańdy prezident dep esepteidi.
Nikolas Madýro qańtarda AQSh-pen diplomatiialyq qarym-qatynasyn úzetinin málimdep, amerikalyq diplomattardyń elden shyǵýyna 72 saǵat ýaqyt bergen. Biraq ol kezde elshilik qyzmetkerleri bul buiryqqa baǵynbaǵan.
Dúisenbi kúni Pompeo reseilik «Rosneft» kompaniiasynyń AQSh-tyń sanktsiialaryna qaramastan PDVSA-dan munai satyp alýdy jalǵastyrýda ekenin aitty. Onyń oiynsha, «Rosneft» basshysy Igor Sechin Madýro júiesin saqtap qalýǵa kúsh salyp jatyr. «Rosneft» buǵan qatysty áli málimdeme jasaǵan joq.
Venesýeladaǵy jaǵdai
Venesýela besinshi kún qatarynan elektr jaryǵynsyz otyr. Eldiń kóp bóligin elektr qýatymen qamtamasyz etetin gidroelektrostantsiialardyń birinde aqaý paida bolǵan. Biraq, Madýro elektr jaryǵynyń óshirilýi AQSh-tyń is-áreketi ekenin alǵa tartty. Oppozitsiia, óz kezeginde, zaýyt pen elektr torabynda tehnikalyq qyzmet kórsetýdiń joqtyǵyn aityp, bilikti kinálaýda.
Venesýelanyń ekonomikasy quldyraýdyń altynshy jylyn, 1920 jyldary Veimar Respýblikasy men 2000 jyldary Zimbabvede bolǵan krizisti bastan ótkerýde. Milliondaǵan venesýelalyqtar elden ketip qalǵan.
Saltanat ShYNÁDIL
