QR Premer-Ministriniń orynbasary Eraly Toǵjanovtyń tóraǵalyǵymen ótken vedomstvoaralyq komissiianyń otyrysynda elimizdegi sanitarlyq-epidemiologiialyq jaǵdaidy turaqtandyrý boiynsha birqatar mańyzdy sheshimder qabyldandy, dep habarlaidy "Ult aqparat".
Memleket basshysynyń tapsyrmasyn oryndaý úshin Atyraý oblysynyń kadrlyq áleýetin nyǵaitý maqsatynda óńirge 102 joǵary bilikti maman, Mańǵystaý oblysyna 56 maman jiberiletin boldy;
Bir ret qoldanylatyn úsh qabatty meditsinalyq maskanyń bólshek saýdadaǵy shekti baǵasy 118 teńgeden 85 teńgege deiin, iaǵni 28%-ǵa arzandatyldy;
Otandyq óndiristiń kólemin eskere otyryp, búgingi kúni óńirlerde dene qyzýyn túsiretin jáne bakteriiaǵa qarsy preparattardyń ailyq qory qalyptastyryldy.
Qazaqstan Respýblikasyna dárilik zattardyń 3,5 mln oramasy jetkizildi, olar óńirler arasynda bólinip, taratylady. Osy aptada qajetti qosymsha dárilik zattardy jetkizý uiymdastyrylady;
Belgilengen sanitarlyq-epidemiologiialyq normalardyń saqtalmaýyna bailanysty, densaýlyq saqtaý, ishki ister ministrlikterine, óńirlerdiń ákimdikterine karantin rejiminiń anyqtalǵan buzýshylyqtaryn joiýǵa baǵyttalǵan barlyq sharalardy qabyldai otyryp, mobildi toptardyń jumysyn kúsheitý tapsyryldy (jeke tulǵalarǵa - 30 AEK, zańdy tulǵalarǵa - 230 AEK kóleminde ákimshilik aiyppul salý kózdelgen);
Sonymen qosa, statsionarlardaǵy patsientterdi ottegimen qoldaýdy qamtamasyz etý maqsatynda óńir ákimdikteri shuǵyl túrde 2600-den astam ottegi kontsentraty men meditsinalyq gazdy satyp alýda.
«Elde barlyq qatań shekteý sharalary qabyldandy. Endi barlyq qoǵamdyq qozǵalystyń áleýetin tarta otyryp, elimizdiń ár aýdanynyń, aýyly men aýlasynyń árbir turǵynyna karantin rejimin saqtaý qajettigi týraly aqparatty sapaly jetkizý qajet», - dep túiindedi E. Toǵjanov.
