Qarjy piramidasy isi boiynsha vainer Meiirjan Tórebaev kepilmen bosatyldy. Bul týraly QR Bas prokýrorynyń orynbasary Áset Shyndaliev málim etti, dep habarlaidy QazAqparat.
Ortalyq kommýnikatsiialar qyzmetinde tilshiler Bas prokýrordyń orynbasarynan qarjy piramidasy boiynsha vainerlerdi jaýapqa tartýǵa qatysty surady.
Óz kezeginde Shyndaliev Mudabarah Capital qarjy piramidasynan zardap shekken áieldiń óz-ózin órtep jiberýi óte qaiǵyly jaǵdai ekenin aitty.
«Zardap shekken adamnyń tezirek saýyǵyp shyǵýyn tileimin. Vainerler boiynsha toqtalsaq, onda 169-dan astam zardap shekken adam bar, keltirilgen shyǵyn 2 mlrd teńge shamasynda. Qylmystyq jaýapkershilikke 14 adam tartylyp jatyr, olardyń arasynda tanymal vainerler, blogerler bar», - dedi ol.
Á. Shyndalievtiń aitýynsha, alty adam qamaýǵa alynǵan, al vainer Meiirjan Tórebaev kepilmen bosatyldy.
«Ár jaǵdaida bultartpaý sharasy jekelei qaralady. Barlyq jaǵdaidy eskere otyryp, iaǵni turaqty turǵylyqty jeriniń, kámeletke tolmaǵan balalarynyń bolýy, onyń qylmysty jasaýdaǵy róli nazarǵa alynady. Osynyń bárin eskerip, sot oǵan qatysty kepilmen bosatý bultartpaý sharasyn tańdady», - dedi ol.
«Kúdiktiniń qamaýda otyrmaýy onyń keiin qylmystyq jaýapkershilikke tartylmaidy degendi bildirmeidi. Qazir is boiynsha tergeý aiaqtaldy, iaǵni tanystyrý kezeńi ótip jatyr. Osy qylmysqa qatysty barlyq kúdiktiniń is-qimylyna baǵa berilip, olarǵa aiyp taǵyldy. Bul rásimder aiaqtalǵannan keiin, ony prokýrorǵa joldaidy. Óz kezeginde prokýror isti sotqa baǵyttaidy», - dedi Bas prokýrordyń orynbasary.
Budan buryn habarlanǵandai, tanymal vainerler Meiirjan Tórebaev, Azizjan Saidbaev jáne Meiirhan Sherniiazov qarjy piramidasyn qurdy degen kúdikpen ustaldy.
Is boiynsha kúdikti Saidbaevqa izdeý jariialandy.
