QR Ulttyq banki «QR qolma-qol shetel valiýtasymen aiyrbastaý operatsiialaryn uiymdastyrý erejelerine ózgerister engizý týraly» qaýlyǵa túsinikteme berdi, dep habarlaidy "Ult aqparat".
Jańa erejege sáikes, qazir aiyrbastaý pýnktiniń eń tómengi jarǵylyq kapitaly Nur-Sultan qalasynda, respýblikalyq mańyzy bar qalalar men oblys ortalyqtarynda ornalasqan aiyrbastaý pýnkteri úshin 100 million teńgeni quraityn bolady.
Sonymen birge, qolma-qol aqshamen aiyrbastaý operatsiialaryn júrgizý úshin aiyrbastaý pýnkti óz shottarynda nemese aiyrbastaý pýnktiniń kassasynda teńge nemese sheteldik valiýtamen eseptegende 100% -dan kem emes mólsherde tazartylǵan altyn quimasynyń (bar bolsa) bolýyn qamtamasyz etýi kerek.
«Birinshiden, barlyq banktik emes aiyrbastaý pýnktteri úshin, ornalasqan jerine qaramastan, 100 mln teńge mólsherinde jarǵylyq kapitaldy qurý josparlandy. Qazir aýyldar men shaǵyn qalalarda ornalasqan nysandar úshin jarǵylyq kapitaldyń mólsheri 50 million teńgege deiin azaityldy. Ekinshiden, bul normany engizý ýaqyty aýystyryldy. Bastapqyda olar talapty 2020 jyldyń 1 qańtarynan bastap engizýdi josparlady. Túzetilgen nusqaǵa sáikes respýblikalyq mańyzy bar qalalarda ornalasqan uiymdar úshin norma 2020 jyldyń 1 sáýirinen bastap kúshine enedi. Oblystardyń jáne oblystyq mańyzy bar qalalardyń ákimshilik ortalyqtarynda - 2020 jyldyń 1 shildesinen bastap kúshine enetin bolady», - dep túsindirdi Ulttyq bank qolma-qol aqsha ainalymy departamentiniń direktory Jomart Qajymuratov.
Sonymen qatar, jańa erejege sáikes, aiyrbastaý pýnktteri 1 aqpannan bastap 9:00-den 20:00-ge deiin jumys isteidi.
Ulttyq bank qolma-qol aqsha ainalymy departamentiniń direktory Jomart Qajymuratovtyń aitýynsha, jumys kestesi aiyrbastaý pýnktteri men olardyń klientteriniń qaýipsizdigin jaqsartýǵa bailanysty ózgerip otyr.
Onyń paiymdaýynsha, bul shara keshki jáne túngi ýaqytta qolma-qol sheteldik valiýtany satyp alýda valiýta kýrsynyń ósý faktilerin boldyrmaýǵa, halyq arasynda negizsiz dúrligý bolmaýyna kómektesedi.
Áýejai, temirjol arqyly Qazaqstanǵa keletin/ketetin jáne memlekettik shekara arqyly ótkizý pýnktindegi adamdar úshin aiyrbastaý pýnktteri táýlik boiy jumys isteidi. Al, birinshi sanattaǵy iri saýda ortalyqtarynda saǵat 9:00-den 22:00-ge deiin jumys isteidi.
Sondai-aq, endi aqsha aiyrbastaý pýnkteri ár operatsiiany jýrnalǵa tirkep otyrady. Iaǵni aqpannan bastap aqsha aiyrbastaǵan adamnyń aty-jóni men jeke kýáliginiń nómiri jazylady.
«Ár aiyrbastaý operatsiiasynan keiin qyzmetkerler jýrnalǵa adamnyń jeke kýáligindegi málimetterdi (tegi, aty, ákesiniń aty), berilgen kúnin, qujattyń nómirin, jaramdylyq merzimin jazyp alady. Sonymen qatar, jańa talap boiynsha aiyrbastaityn aqshanyń kólemi 500 myń teńgeden aspaýy kerek», - deidi Jomart Qajymuratov.
Onyń aitýynsha, bul - álemniń kóptegen elinde qoldanylatyn halyqaralyq tájirbie.
