Valeriia Shalnova. Foto lada.kz
Valeriia Shalnovanyń ólimine qatysty is boiynsha Aqtaý politseilerine qatysty tergeý jalǵasyp jatyr. Eki tártip saqshysy qyzmetinen bosatyldy, - dep habarlaidy Tengrinews.kz saity Lada.kz portalyna silteme jasap.
Mańǵystaý oblysy prokýratýrasynyń málimetinshe, sotaldy tergep-tekserý 3 qazanda bastalady, alaida tergeýdiń tolyqtyǵyn, obektivtiligin jáne jan-jaqtylyǵyn qamtamasyz etý maqsatynda odan ári tergeý sybailas jemqorlyqqa qarsy qyzmetke júktelgen.
"Sondai-aq sotaldy tergep-tekserýmen qatar bir mezgilde qyzmettik tekseris júrgizilip, onyń nátijesinde Mańǵystaý oblysy Politsiia departamentiniń tártiptik komissiiasynyń sheshimi boiynsha eki politsiia qyzmetkeri qyzmetinen bosatyldy", - dep habarlady prokýratýra.
Tártip saqshylary qyzmettik ókiletin asyra paidalandy degen kúdikke ilingen.
Qadaǵalaý organy atqaratyn qyzmetinen bosatý qyzmetkerlerdi jumystan shyǵarýdy bildirmeitinin atap ótti. Demek, sońǵy sheshim Antikor tolyq tekseris júrgizgennen keiin qabyldanady.
Eske salaiyq, Aqtaýda 2 shilde kúni sý arnasynan jas sportshy Valeriia Shalnovanyń denesi tabylǵan bolatyn. Ol kásibi túrde qoian-qoltyq uryspen ainalysqan. Sporttyq jarystarǵa qatysyp, birqatar júldege de ie bolǵan.
Politsiia Qylmystyq kodekstiń 105-baby "Ózin-ózi óltirýge itermeleý" boiynsha is qozǵap, keiin ony 119-bapqa - "Qaýipti jaǵdaida qaldyrýǵa" ózgertti. Keiin quqyq qorǵaý organdary 21 jastaǵy sportshynyń ólimine qatysty bapty Qylmystyq kodekstiń 99-baby "Adam óltirý" dep ózgertti. Kúdikti qamaýǵa alyndy.
