Parlament Senatynyń Tóraǵasy Máýlen Áshimbaev Memleket basshysy Qasym-Jomart Toqaevtyń Úkimettiń keńeitilgen otyrysynda sóilegen sózine qatysty pikir bildirdi, dep habarlaidy "Ult aqparat".
«Memleket basshysynyń tóraǵalyǵymen Úkimettiń keńeitilgen otyrysy ótti. Aldaǵy baǵyt-baǵdar men negizgi maqsat-mindetter pysyqtaldy. Prezidentimiz óz sózinde qazaqstandyqtardyń naqty tabysyn arttyrý, shaǵyn jáne orta biznesti qoldaý, ekonomikalyq ósýdi qamtamasyz etý máselelerine basa mán berdi. Sondai-aq, Qasym-Jomart Kemeluly memlekettik shyǵyndardy ońtailandyrý, azamattardyń ótinishterin qaraýdyń tiimdiligin arttyrý jáne internettiń sapasy men jyldamdyǵyna qatysty máselelerdi sheshý jumystary boiynsha tapsyrmalar berdi.
Prezidentimiz satyp alýdaǵy jergilikti ónimderdiń úlesin ulǵaitý jáne azamattardy, ásirese, aýyl turǵyndaryn jumyspen qamtý boiynsha atqarylǵan sharalardyń olqy tustaryna erekshe toqtaldy. Memleket basshysy kóleńkeli ekonomikamen, jalǵan kásiporyndarmen jáne ádeii salyq tólemeitin kásipkerlermen kúres máselesine de nazar aýdardy. Investitsiia tartý júiesin jaqsartý boiynsha usynystar engizýdi tapsyrdy. Otyrysta elimizdiń ár óńirindegi arnaiy ekonomikalyq aimaqtardyń tiimdiligine qatysty máseleler de kóterildi», - dep jazdy Máýlen Áshimbaev jelidegi paraqshasynda.
Sonymen qatar, ashyq básekelestikke kedergi keltiretin negizgi problemalardy sheshý úshin 2022 jyldyń 1 qańtaryna deiin tiisti zań qabyldaý jumystaryn qamtamasyz etý tapsyryldy.
«Jer komissiiasynyń jumysy qaita jandanatyn boldy. Bul baǵytta Memleket basshysy aýyl turǵyndaryn alańdatyp otyrǵan jaiylymdar máselesine de basa kóńil bóldi. Ekologiia salasy boiynsha atqarylyp jatqan jumystarǵa qoǵamdyq baqylaý júrgizý úshin «Jasyl Qazaqstan» ulttyq jobasy ázirlenedi.
Densaýlyq saqtaý jáne bilim berý salalaryn ári qarai reformalaýǵa qatysty jańa bastamalar da aityldy. Sonyń aiasynda densaýlyq saqtaý uiymdarynda inventarizatsiia júrgiziledi jáne jyl sońyna deiin 200 jańa mektep salynady. Odan bólek, Qazaqstan tarihy jáne dúniejúzi tarihy pánderi boiynsha biryńǵai oqýlyq ázirlenedi», - dep tolyqtyrdy.
Sonymen qatar, Senat Tóraǵasy Memleket basshysy halyqty vaktsinatsiialaý máselesin de nazardan tys qaldyrmaǵandyǵyn jáne bul taqyryp qazir qoǵamda jan-jaqty talqylanyp jatqanyn jetkizdi.
«Osy rette Densaýlyq týraly kodeksti qabyldaý kezinde senatorlar emdeýden jáne profilaktikalyq ekpelerden bas tartý múmkindigi týraly túzetýler engizgenin atap ótken jón. Sondyqtan áleýmettik jelilerde aitylyp júrgen keibir pikirlerge bailanysty Qazaqstanda vaktsina egýdi májbúrli túrde júrgizý múmkin emestigin aitqym keledi.
Alaida, tek vaktsinatsiia arqyly ǵana pandemiiaǵa tosqaýyl qoiýǵa bolatynyn túsinýimiz kerek. Tarihta mundai jaǵdai alǵash ret bolyp otyrǵan joq. Indet jailaǵan kezeńderde vaktsina adamzatty birneshe ret aman saqtap qaldy. Sondyqtan qazir tańdaý jasaýymyz qajet. Qansha ýaqytqa jalǵasatyny belgisiz, úlken áleýmettik saldary bar karantindik shekteýlerdi ári qarai kúsheitken durys pa, álde jappai vaktsinatsiialaý arqyly ujymdyq immýnitet qalyptastyryp, qalypty ómirimizge qaita oralǵanymyz jaqsy ma? Jaýap árkimge túsinikti bolar.
Vaktsinatsiialaý - májbúrli shara emes. Biraq, tutas halyqtyń densaýlyǵyn saqtaý turǵysynan óte mańyzdy qadam. Sondyqtan memlekettik apparat pen qoǵamdyq institýttar bul baǵytta túsindirý jumystaryn keńinen júrgizýge tiis.
Búgingi otyrysta Prezidentimiz budan basqa da mańyzdy máselelerge toqtalyp, Úkimet pen ákimderge naqty mindetter júktedi. Osyǵan orai Senat aldaǵy ýaqytta Májilispen birlesip, Memleket basshysynyń bastamalary men tapsyrmalaryn tabysty iske asyrýǵa qajetti zańdar qabyldaý jumystaryna basymdyq beredi», - dedi ol.
