Foto: QR DSM
Qaraǵandy oblysynda balanyń qaitys bolýyna bailanysty tekseris bastaldy. Densaýlyq saqtaý ministrligi jaǵdaidyń kúrdeli meditsinalyq sebeptermen bailanysty ekenin málimdedi, dep habarlaidy Ult.kz.
Qaraǵandy oblysynda balanyń qaitys bolý deregi boiynsha jan-jaqty tekserý júrgizilip jatyr. Densaýlyq saqtaý ministrligi marqumnyń týǵan-týystary men jaqyndaryna kóńil aitty.
Resmi málimetke sáikes, bala aýrý bastalǵannan keiingi ekinshi táýlikte infektsiialyq ortalyqqa jatqyzylǵan. Jaǵdaiy kúrt nasharlap, keiin reanimatsiia jáne qarqyndy terapiia bólimshesine aýystyrylǵan.
Tekserý barysynda naýqasta bakteriialyq, virýstyq jáne sańyraýqulaq tekti qozdyrǵyshtar qatar kezdesken aralas infektsiia anyqtalǵan. Mamandardyń aitýynsha, derttiń aýyr ótýine aiqyn immýn tapshylyǵy men týǵannan bastap vaktsinatsiianyń bolmaýy áser etken. Bul aǵzanyń infektsiiaǵa qarsy turý qabiletin álsiretip, emniń tiimdiligin tómendetken.
Dárigerler meditsinalyq kómektiń tolyq kólemde, qoldanystaǵy klinikalyq hattamalarǵa sáikes kórsetilgenin habarlady. Emdeý taktikasy birneshe márte respýblikalyq deńgeidegi konsiliýmdarda qaralyp, oǵan jetekshi balalar infektsionisteri, pýlmonologtar men reanimatologtar qatysqan.
Sondai-aq ekstrakorporaldyq membranalyq oksigenatsiia (EKMO) ádisin qoldaný múmkindigi talqylanǵan. Alaida naýqastyń jaǵdaiyn eskere otyryp, bul tásildi paidalaný usynylmaǵan.
Qarqyndy terapiia júrgizilgenimen, balany aman alyp qalý múmkin bolmaǵan.
Ministrlik mundai jaǵdailardyń meditsinalyq turǵydan asa kúrdeli ekenin atap ótti. Aýyr infektsiia, immýn tapshylyǵy jáne vaktsinatsiianyń bolmaýy qatar kelgende, tipti ýaqtyly kórsetilgen emniń ózi nátijesiz bolýy múmkin.
Qazirgi ýaqytta kórsetilgen meditsinalyq kómektiń sapasyn baǵalaý úshin táýelsiz sarapshylar tartylyp, qosymsha tekserý júrgizilmek. Quzyrly organ qoǵamdy tek resmi aqparatqa súienýge jáne rastalmaǵan málimetterdi taratpaýǵa shaqyrdy.
