QR DSM Sanitariialyq-epidemiologiialyq baqylaý komitetiniń vaktsinaǵa kónetin infektsiialardy baqylaý basqarmasynyń basshysy Nurshai Ázimbaeva koronavirýsqa qarsy vaktsinanyń mańyzy týraly aityp berdi, dep habarlaidy QazAqparat.
QR DSM Sanitariialyq-epidemiologiialyq baqylaý komitetiniń vaktsinaǵa kónetin infektsiialardy baqylaý basqarmasynyń basshysy Nurshai Ázimbaeva:
«Vaktsinalaýdyń mańyzy týraly aita ketkim keledi. Vaktsinalaý – indetke qarsy turýdyń, adamdardy koronavirýs qaýpinen saqtandyrýdyń eń ozyq amaldarynyń biri. Ekpe saý adamdarǵa salynatyndyqtan, halyq arasynda qazir egiletin preparatqa kúmánmen qaraityndar da bar. Ol túsinikti. Saý adamǵa vaktsina salynǵannan keiin onyń boiynan jaǵymsyz áserler baiqalsa, álbette, halyq odan qorqa bastaidy. Bul rette infektsiianyń asa bir úreili kezeńderi ótkendei bolǵandyqtan, halyq onyń qaýpinen góri vaktsinanyń jaǵymsyz áserine kóbirek nazar aýdarýda», - dedi Nurshai Ázimbaeva.
Basqarma basshysy mysalǵa poliomielit aýrýyn keltirdi.
«Buryn atalarymyz ben ájelerimizge vaktsinanyń nelikten kerektigin túsindirýdiń ózi de artyq bolatyn. Óitkeni ár aýylda poliomielitpen aýyratyn adamdar kóp edi. Bul aýrýǵa shaldyqqandar ornynan qozǵala almai, qozǵala alatyndary qolyna taiaq ustap áreń júretin. Qyzylshada da sol. Bir úide 10-15 bala bolǵan kezderde qyzylshaǵa shaldyǵyp, ajaldyń sodan keletin jaǵdaiy da kóp bolǵan. Oǵan qarsy vaktsina paida bolǵan kezde adamdar oilanǵan joq – birden ekpe aldy. Sebebi vaktsinanyń jaǵymsyz áserinen góri aýrýdyń ózi neshe ese qaýipti ekenin jaqsy túsinetin. Buryn qaýipti bolǵan sol infektsiialar qazir «shegindi». Olar da bir kezderi koronavirýs sekildi jurttyń úreiin ushyratyn. Sondyqtan sol infektsiialar vaktsinalar arqyly joiylǵanyn eske salamyz», - dedi Nurshai Ázimbaeva.
Eske sala ketsek, buǵan deiin Nurshai Ázimbaeva aqyly ekpe kabinetterinde KVI-ge qarsy vaktsina salynbaitynyn eskertken edi.
