Messendjerler men áleýmettik jeliler arqyly qazaqstandyqtar arasynda koronavirýsqa qarsy vaktsinalar Parkinson, Altsgeimer jáne Lý Gerig aýrýyn damytýy múmkin degen habarlama tarap jatyr. Mundai saldardy vaktsina quramyndaǵy aliýminii týdyrýy múmkin ekeni aitylǵan, - dep habarlaidy Stop Fake.
Portal málimeti boiynsha, aliýminii adiývanty keibir vaktsinalarda qoldanylady. Biraq vaktsina quramyndaǵy aliýminii mólsheri ruqsat etilgen normalardan aspaidy jáne adam densaýlyǵyna áser etpeidi.
Málimet boiynsha, bul preparat quramyndaǵy álsiregen patogenniń az mólsherine kúshti immýndyq reaktsiia týdyrý úshin qajet. Mundai adiývanttar 1930 jyldary qoldanyla bastaǵan. Sol kezden beri Parkinson, Altsgeimer jáne Lý Gerig aýrýlary túrindegi janama áserler tirkelmegen.
Portal málimetine súiensek, AQSh-tyń tamaq ónimderi jáne dári-dármek sapasyn sanitariialyq qadaǵalaý basqarmasynyń qaýlysyna sáikes, aliýminiidiń táýliktik normasy 25 mikrogrammnan aspaýy tiis. Alaida bul norma tek parenteraldy tamaqtaný júiesine (qorektik zattardy tikelei qanǵa engizý) jáne sábilerge beriletin jasandy sút untaǵyna qatysty aitylǵan. Vaktsinamen aliýminiidiń mundai dozasyn alý jáne ony teri astyna engizý múmkin emes.
Kúndelikti ómirde adamdar 25 mikrogrammnan artyq aliýminii tutynady. Bul metall qara bidai men bidai uny, kartop, qyryqqabat, baialdy, qyzylsha, burshaq, kúrish, kivi jáne t.b. keńinen qoldanylatyn ónimderde kezdesedi.
Aita keteiik, Parkinson, Altsgeimer jáne Lý Gering aýrýlary egde jastaǵy adamdar arasynda óte jii kezdesedi. Onyń ústine, Parkinson men Altsgeimer aýrýlary aliýminii qosylǵan vaktsinalar men adiývanttar oilap tabylǵanǵa deiin anyqtalǵan jáne tolyq sipattalǵan.
Lý Gerig aýrýyna qatysty naqty sebepteri áli belgisiz. Keibir jaǵdailarda ol tuqym qýalaityn gendik mýtatsiia nátijesinde týyndaidy, bul onyń vaktsina alý saldarynan bolýy múmkin emestigin kórsetedi.
