Qazaqstan koronavirýsqa qarsy AstraZeneca vaktsinasyn óndirýshilermen kelissózdi toqtatty. Bul týraly juma kúngi brifing kezinde "SK-Farmatsiia" kompaniiasy basqarmasynyń tóraǵasy Erhat Esqaliev habarlady.
"Barlyq óndirýshilermen kelissóz júrgizilip jatyr, AstraZeneca-men kelissóz toqtatyldy, sebebi vaktsina tóńireginde negativ kóp" dedi Esqaliev.
Onyń sózine qaraǵanda, Pfizer vaktsinasyn óndirýshilermen kelissóz jalǵasyp jatyr, alaida kompaniia ázirge ekpeni jetkizý kestesin kórsetpegen.
Aǵylshyn-shved kompaniiasy men Oksford ýniversiteti birigip jasaǵan AstraZeneca (2 dozaly) vaktsinasy adam aǵzasynda trombtardyń túzilýine yqpal etýi múmkin degen aqparatqa alańdaǵan keibir elder osyǵan deiin atalǵan vaktsinany paidalanýdy shektegen edi. Al Eýropanyń retteýshi organy vaktsinanyń qaýipsiz ári tiimdi ekenin aitqannan keiin Eýropada vaktsinalaý naýqany jalǵasqan.
Naýryz aiynyń sońynda AstraZeneca kompaniiasy qaita tekseristen soń preparattyń tiimdiligin 85 paiyzdan 79 paiyzǵa túsirgen.
Qazaqstanda qazir azamattarǵa reseilik "Spýtnik V", qazaqstandyq QazVac jáne qytailyq Sinopharm jáne "Sinovac Biotech Ltd" kompaniiasynyń CoronaVac (Sinovac) vaktsinasy egilip jatyr.
