Belgili baspager, birneshe kitaptyń avtory Baqytjan Buharbai Uzynaǵashta Resei basqynshylaryna arnap ornatylǵan eskertkishti súrip tastaýdy usyndy, dep habarlaidy "Ult aqparat".
Atalǵan usynysyn ol óziniń Facebook jelisindegi paraqshasynda jetkizgen.
“Uzynaǵashta Resei basqynshylyǵyna arnalǵan eskertkish tur. Ótkende ádeii sol jerge soǵyp, osy videony túsirdim.
Osyndai úlgidegi stelalardy Resei imperiiasy jergilikti halyqtyń qanyn tógip, basyp alǵan jerlerde ornatatyn bolǵan. Tóbesinde imperiianyń búrkiti tur: bir qonǵan jerden ushpaimyn, bir ornyqqan mekennen ketpeimin degendi meńzeidi.
Qashan ornatylǵanyn bilmeimin, biraq ainalasy biraz kútilmegeni kórinip tur: shóp basyp, plitkalary qirai bastaǵan. Soǵan qaramastan jaqynda bir taqta ornatypty. Sonda orystyń ózine kerek bolmai qalǵan dúnieni qazaqtyń qasterlep saqtap júrgenin qalai túsinýge bolady? Aýdan basshylyǵy men Prezident ákimshiligi qaida qarap júr?
Qazaqqa jat eskertkishti súrip tastaý durys sheshim bolar edi. Al eń sumdyq ideologiiasynyń kórinisi tómendegi videoda”, – dep jazdy ol.
Buharbaidyń talabyna Almaty oblysy ákimdiginiń baspasóz hatshysy pikir qaldyrǵan. Ǵalymurat Júkel bul eskertkish týraly jazbany Mádeniet basqarmasynyń basshysy Áliia Jaqypbekovaǵa jibergen.
“Posttyń siltemesin jiberdim. Tolyq aqparatyn jinap, qashan, kimder ornatqanyn bilip, tolyqtyryp jaýap berem”, – dep jazady.
