Uzynaǵash bazarynda mal satyp júrip joǵalyp, sońynda qylmyskerler qolynan qaza tapqan úsh jigittiń ólimine burynǵy politsiia qyzmetkeriniń qatysy bar bolýy múmkin. Bul týraly Baq.kz redaktsiiasyna qaza bolǵan jigitterdiń biriniń týǵan aǵasy Adal Zarlyhan habarlady.
Oqiǵa kýágerlerimen bir-birlep sóilesken Adal Zarlyhan ótkendegi izdeý jumystary kezindegi oqiǵalardy esine ala otyryp, bylai baiandady:
«Politseilerden esh habar bolmaǵan soń, janyma birneshe jigit alyp, jol talǵamaityn kólikpen inilerimdi ózim izdeýge shyqtym. 23 qyrkúiekte Jambyl oblysy Degeres aýyly mańynan ekinshi mashina tabyldy.
Bul jaiynda bizge qytaidan kóship kelgen beitanys oralman jigit habarlady. Ol mal satyp júrgen jigitterdiń joǵalǵanyn, politseilermen birge eriktilerdiń de izdep jatqanyn internetten oqyǵan. Uzynaǵash jaqqa kele jatyp, jolshybai iesiz turǵan kólikti fotoǵa túsirip alypty. Sosyn tileýlestik nietpen bizge habarlap, vatsappen fotosyn jiberdi. Esti sala, tańǵy bes mólsherinde politseilermen birge mashina turǵan aýylǵa bardyq. Ony ózge eki politsei kúzetip tur eken.
Kólikti kórgenin alǵash bizge habarlaǵan álgi jigit, «keshe keshte óziniń bir tanysynyń mal tiep kele jatyp, buzylyp, otalmai qalǵan bir júk kóligin jóndep bergenin» aityp, ol adamnyń telefon nómirin berdi. Biz álgi adamǵa habarlasyp, kezdestik.
Onyń aitýynsha: «buryn politsiia qyzmetkeri bolǵan bir jigit kelip, mashinalary buzylyp qalǵanyn, jóndep berýin ótinip, sol jaqqa ertip bardy. Kólik qasyna barsam taǵy eki adam júr eken. Kólik iesi solar eken dep oiladym da, mashinalaryn jóndep, otaldyryp berdim. Qytaidan kelgen jigitterdi sóz láminen bylai tanimyn ǵoi. Ol eki jigit maǵan jergilikti qazaqtar siiaqty kórindi. Men kelerden buryn olar buzylǵan mashinany súiretpekshi bolyp, traktor shaqyrǵan eken. Ol adam da bizben birge boldy. Álgi kóliktiń buzylǵan jerin jóndep bolǵan soń, mashinaǵa asyǵys otyrǵan olar kólikti ornynan qozǵap qalǵanda, jol jiegine jaqyn turǵan traktordy soǵyp, aýdaryp tastady. Ol jerde traktor iesi ana jigitterge renjip, óziniń aýdarylǵan traktoryn súirep turǵyzý úshin taǵy bir adamdarǵa habarlasyp jatty. Kólikterin jóndep berip, negizgi sharýam bitken soń men úiime qaityp kettim» dedi».
Sonymen qosa Adal Zarlyhan BAQ ókilderi men eriktilerdiń, ózge de belsendi azamattardyń aralasýymen qoǵamda zor dúmpý týdyrǵan bul oqiǵa barysynda politseilerdiń tym sylbyr qimyldaǵanyn, tipti, ózderine jekip, úilerine qaitaryp jibermek bolǵanyn da ashyq aitty.
Taǵy bir kýágerler Degeresten tabylǵan júk kóliginiń túnde joǵaryda aitylǵan politsiia qyzmetkeriniń úiinde turǵanyn, ertesinde alys jaqqa ienge áldebireýderdiń aparyp tastaǵanyn da aitady deidi - ol.
Biraq, bul jaiynda ishki ister organdary resmi túsinikteme bergen joq.
