Ońtústik Jezqazǵan kenishinde «Qazaqmys Korporatsiiasy» JShS basshysy R. Óskenáli eńbek ujymymen kezdesý ótkizdi. Mundai ashyq formattaǵy júzdesý kóptegen jumysshylar úshin tosyn jańalyq boldy. Shahterlerdiń aitýynsha, kompaniianyń burynǵy basshylyǵy óndiristik alańdarda osyndai jedel ári ashyq kezdesýler ótkizbegen, dep habarlaidy ult.kz.
Kezdesý barysynda kompaniianyń jańa basshylyǵy jumysynyń negizgi baǵyttary tanystyryldy. Áńgime shikizattyq resýrstyq bazany keńeitýge baǵyttalǵan uzaq merzimdi investitsiialar, jabdyqtardy jańǵyrtý, ónerkásiptik qaýipsizdik deńgeiin arttyrý jáne kásiporynnyń aldaǵy jyldardaǵy turaqty jumysyn qamtamasyz etý máseleleri týraly órbidi.
Áleýmettik máselelerge de erekshe nazar aýdaryldy. Jumysshylarǵa turǵyn úi salý, óńirdiń mádeni jáne rýhani infraqurylymyn damytý josparlary, sondai-aq kúkirt qyshqylyn óndiretin zaýyt salýdy qosa alǵanda, ekologiialyq máselelerdi sheshýge baǵyttalǵan jobalar tanystyryldy.
Eńbek ujymynyń ókilderi ózderin tolǵandyrǵan suraqtaryn qoiyp, jan-jaqty jaýap aldy. Talqylaý syndarly jaǵdaida ótip, qyzmetkerler tarapynan úlken qyzyǵýshylyq týdyrdy.
Óndiristik qýattardy jańartýdan bastap, qyzmetkerler men olardyń otbasylaryna arnalǵan áleýmettik baǵdarlamalardy keńeitýge deiingi bastamalar oń baǵasyn aldy. Ujym keibir usynystardy qol shapalaqtap qarsy aldy.
Kezdesý qorytyndysy boiynsha taraptar kásiporyndy damytý, qaýipsizdik deńgeiin arttyrý jáne eńbek jaǵdailaryn jaqsartý máseleleri boiynsha ózara yntymaqtastyqty jalǵastyrýǵa daiyn ekenderin rastady.
