Aqtóbe oblysynyń qylmystyq ister jónindegi mamandandyrylǵan aýdanaralyq sotynda kámelet jasqa tolmaǵan balaǵa seksýaldyq zorlyq kórsetken sottalýshy B.N.Nurjanovqa qatysty sot úkimi shyqty, dep habarlaidy QazAqparat.
Sottalýshy B.N.Nurjanovqa jas balaǵa qatysty seksýaldy sipattaǵy zorlyq-zombylyq áreketterin jasaǵany ( QR QK-niń 121-babynyń 4-bóligimen ) jáne qamaqtan qashqany úshin (QR QK-niń 426-babynyń 1-bóligimen) aiyp taǵylyp, qylmystyq is qaraldy.
Sot otyrysynda sottalýshy óz kinásin tolyǵymen moiyndap, ókingenin aitty.
Memlekettik aiyptaýshy sottan B.N.Nurjanovqa 20 jyl 6 ai merzimge bas bostandyǵynan aiyrý jazasyn taǵaiyndaýdy surady.
«Qylmystyq kodekstiń 121-baby 4-bóligi belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyra otyryp, 20 jyl merzimge bas bostandyǵynan aiyrý túrindegi jazany kózdeidi. Qylmystyq kodekstiń 426-baby 1-bóligi úsh jylǵa deiingi merzimge bas bostandyǵynan aiyrý túrindegi jazany kózdeidi. Jazany taǵaiyndaý kezinde sot B.N.Nurjanovtyń buryn aýyr jáne asa aýyr qylmystar jasaǵany úshin sottalǵanyn jáne kámelet jasqa tolmaǵan balaǵa qatysty jasalǵan qylmystyń qoǵamdyq qaýiptiligin eskerdi. Sot B.N.Nurjanovty kináli dep tanyp, ony 22 jylǵa bas bostandyǵynan aiyrdy», - dep habarlady oblystyq sottyń baspasóz qyzmeti.
Sot úkimi zańdy kúshine engen joq.
