Jas jigit Reseide afrikalyq arystannyń kúshigin satyp alyp, ony eshqandai ruqsatsyz Qazaqstanǵa alyp kelgen, dep habarlaidy "Ult aqparat".
«Daniial Smaǵulov Ákimshilik kodekstiń 389-baby, birinshi bóligi boiynsha kináli dep tanylyp, oǵan 27 780 teńge kóleminde aiyppul salynsyn jáne 2019 jyldyń besinshi qarashasynda týǵan Simba atty afrikalyq arystannyń kúshigi tárkilensin», - dep sheshim shyǵardy Pavlodar qalasy mamandandyrylǵan ákimshilik sotynyń sýdiasy Serik Mardanov.
Sottyń málimetinshe, 9 sáýirde «Brakoner» jedel-profilaktikalyq is-shara barysynda áleýmettik jelige monitoring júrgizý kezinde 23 jastaǵy Daniial Smaǵulovtyń afrikalyq arystan kúshigi bar ekeni anyqtaldy.
Belgili bolǵandai, ol 31 naýryzda jabaiy janýardy Reseiden sáikes ruqsat qujatynsyz Qazaqstanǵa ákelgen. Arystan kúshigi Quryp ketý qaýpi tóngen jabaiy faýna men flora túrlerimen halyqaralyq saýda týraly konventsiiaǵa jatatyn bolyp shyqty. Oǵan osylaisha ákimshilik quqyq buzdy degen aiyp taǵyldy. Jigit sotta kinásin moiyndady.
«Ol afrikalyq arystandy ákelýge ruqsat qujatyn almaǵanyn túsindirdi. Ol janýardy 2020 jyldyń 11 aqpanynda RF «Amýrskii tigr» jaýapkershiligi shekteýli qoǵamdastyǵynan satyp alyp, Qazaqstan Respýblikasynyń aýmaǵyna alyp ótken» dep habarlady sottan.
Sot isine qatysqan Pavlodar oblysy orman sharýashylyǵy jáne janýarlar álemi aýmaqtyq inspektsiiasynyń bas mamany Qabdýlla Sýhanqulov afrikalyq arystannyń joiylý qaýpi bar janýarlar túrine jatatynyn jáne Quryp ketý qaýpi tóngen jabaiy faýna men flora túrlerimen halyqaralyq saýda týraly konventsiiaǵa enetin osyndai janýarlardy ákelý úshin mindetti túrde ruqsat qujaty bolýy kerektigin atap ótti.
«Janýardyń jeke kartochkasy bolǵan. Oǵan sáikes, arystannyń kúshigi RF «Amýrskii tigr» jaýapkershiligi shekteýli qoǵamdastyǵynda (Primor ólkesi Shkotovo aýdany Shkotovo kenti) týǵan. Simba atty afrikalyq arystannyń halyqaralyq veterinarlyq tólqujaty bar, alaida afrikalyq arystandy alyp ótýge ruqsaty bolmaǵan», - dep atap ótti Pavlodar qalalyq mamandandyrylǵan ákimshilik sotynan.
