Uialy bailanys operatorlaryna tólem tolyq bir kúntizbelik aiǵa jasalatyn tariftik jospar qurý mindetteldi, dep habarlaidy "Ult aqparat" QR Tsifrlyq damý, innovatsiialar jáne aeroǵarysh ónerkásibi ministrligine silteme jasap.
QR Tsifrlyq damý, innovatsiialar jáne aeroǵarysh ónerkásibi ministrligi uialy bailanys qyzmetterin kórsetý qaǵidalaryn ózgertti. Endi mobildi operatorlar abonentterge ózge tariftik josparlarmen qatar, tólem bir kúntizbelik aiǵa jasalatyn tariftik jospardy da usynýy tiis.
Ózgertýlerdiń arqasynda abonentter tariftik josparlardyń ishinen ózine qajetin tańdai otyryp, ony tolyq bir ai paidalana alady.
Mysaly, eger abonent tariftik josparǵa aidyń sońǵy kúni qosylsa onyń jeke shotynan bailanys qyzmeti úshin tólem kelesi aidyń sońǵy kúni shegeriledi.
Sonymen qatar, atalǵan tariftik jospardaǵy qyzmetter kólemi aiaqtalǵannan keiin operator abonenttiń kelisiminsiz qyzmettiń qosymsha kólemi úshin aqy ala almaidy.
Munymen qosa, erejege «bazalyq tariftik jospar» uǵymy engizildi. Bul tarif abonenttik tólemdi talap etpeidi, tek naqty paidalanǵan minýt nemese SMS sanyna ǵana tólem jasai otyryp, qońyraý shalýǵa jáne SMS jiberýge múmkindik beredi.
«Bazalyq tariftik jospar» abonent nómirdi basqa uialy bailanys operatorynyń jelisine aýystyrǵanda (MNP qyzmeti), jańa tariftik jospardy tańdap úlgermegende, sondai-aq qoldanystaǵy tariftik jospar áreket etýin toqtatqan jaǵdaida qosylady.
Buǵan deiin uialy bailanys operatory abonentte qandai da bir tariftik jospar bolmasa, ony ózderi abonenttiń kelisiminsiz kez-kelgen tariftik josparǵa qosa alatyn.
Bailanys operatorlary «bazalyq tariftik josparǵa» ózgeristi jylyna bir ret qana engize alady jánebul týraly ol abonentti naqty ózgeristerge deiin kúntizbelik otyz kún buryn habardar etýge mindetti.
