Janýarlardy qorǵaýdaǵy azamattyq bastamalardy qarjylandyrý ideiasyn ilgeriletý sharalary qabyldanady. Bul týraly Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy QazAqparat.
«Búgin biz Parlament Májilisiniń bir top depýtattary ázirlegen úi janýarlaryn qorǵaý týraly zań jobasyn qoǵammen talqylaýǵa jinalyp otyrmyz. Qazaqstanda janýarlardy qorǵaý týraly jańa zań jobasynyń qajettiligi áldeqashan jetilgen. Qazirgi ýaqytta barlyq janýarlarǵa, onyń ishinde, úi, jabaiy jáne aýyl sharýashylyǵy janýarlaryna jaýapkershilikpen qaraý týraly birde-bir zań joq. Janýarlarǵa qatygezdik kórsetken adamdar týraly habarlamalar áleýmettik jelilerde jii kezdesip jatyr. Alaida, búginde Qazaqstandaǵy janýarlarǵa qatygezdik kórsetkeni úshin taǵaiyndalatyn jaza tym jeńil. Sondyqtan, Memleket basshysy Qasym-Jomart Kemelulynyń tapsyrmasy boiynsha, birinshi kezekte, janýarlardy haiýanattar baǵynda ustaýǵa qoiylatyn talaptardy qatańdatýdy alǵa qoiyp otyrmyz. Sondai-aq, janýarlardy qorǵaýdaǵy azamattyq bastamalardy qarjylandyrý, zoologiialyq volonterlikti qoldaý men oqýshylar, stýdentter arasynda da janýarlarǵa jaýapkershilikpen qaraý ideiasyn ilgeriletý sharalaryn qabyldaý josparda bar», - dedi ministr onlain rejimde ótip jatqan talqylaýda.
Osy oraida ol sońǵy kezderi janýarlarǵa qatygezdikpen qaraý faktileri qoǵamda keńinen talqylanǵanyn eske saldy.
«Shyn máninde problema óte kúrdeli. Zertteýlerge qaraǵanda, janýarlarǵa qatysty jasalǵan qatygezdik saldary keiinnen adamdarǵa da qatygezdikpen qaraý sekildi qaiǵyly jaǵdailarǵa alyp keledi. Iaǵni qoǵamda psihikasy buzylǵan adamdardyń paida bolýyna yqpal etýi múmkin. Osy oraida qoǵamda ónegelilik qaǵidalaryn, barlyq janýarlarǵa jaýapkershilikpen qaraý normalaryn keńinen nasihattaý kerek», - dedi M. Myrzaǵaliev.
Onyń sózine qaraǵanda, osy protseske qoǵamdy kóptep tartý kerek.
«Osy salada túrli jaǵymsyz kórinisterge naqty zańnamalyq tosqaýyl qoiýymyz kerek jáne zańdy buzǵandarǵa tiisti jazasyn berý qajet. Ózderińiz bilesizder, osy sipattaǵy qylmystar úshin jaza óte jeńil. Sondyqtan ony qatańdatqan durys. Atap aitqanda, atalǵan máseleni eskere otyryp, zań jobasyn jan-jaqty pysyqtaý úshin búgingi talqylaýdy uiymdastyrdyq. Osy oraida zań jobasynyń normalaryn talqylaý men qalyptastyrýǵa belsendi qatysýǵa shaqyramyz», - dedi vedomstvo basshysy.
