Qazaqstannyń sybailas jemqorlyqqa qarsy qyzmeti úi qamaýyndaǵy kúdiktilerge elektrondy bilezikter qoldana bastady. Bul týraly AntikorNews baǵdarlamasynda QR Cybailas jemqorlyqqa qarsy is-qimyl agenttigi tóraǵasynyń tsifrlandyrý jónindegi kómekshisi Aslan Qusaiynov aitty, dep habarlaidy QazAqparat.
«Halyqaralyq tájiribeni eskere otyryp, Agenttik qamaýǵa alýmen bailanysty emes adamdarǵa qatysty bultartpaý sharalaryn qoldanǵan kezde baqylaýdyń elektrondyq quraldary - bilezikterdi qoldana bastady. Biyl 17 qyrkúiek kúni bul tájiribe alǵash ret sybailas jemqorlyqqa qarsy qyzmetpen Qaraǵandy qalasynyń mamandandyrylǵan tergeý sotynyń sheshimimen qylmystyq is boiynsha kúdiktige qatysty úi qamaý túrindegi aldyn alý sharasyn tańdaý kezinde qoldanyldy. Elektrondyq qadaǵalaý quraldaryn kiiý erejeleri kúdiktige tiisti mindetterdi qabyldai otyryp túsindirildi. Sondai-aq, kúdikti jalpy densaýlyǵy men qarsy kórsetilimderiniń bolmaýy boiynsha meditsinalyq tekserýden ótti», – deidi Aslan Qusaiynov.
Onyń aitýynsha, elektrondy bilezikterdi qoldaný kúdiktilerdiń tergeý men sottan qashý áreketterin boldyrmaýǵa múmkindik beredi. Elektrondyq bilezikterdi qoldaný qylmystyq jazany izgilendirý talaptaryna sáikes keledi jáne jaqyn bolashaqta qamaýdaǵy adamdardyń sanyn azaitýǵa múmkindik beredi.
«Elektrondy bilezik – kúdiktiniń nemese aiyptalýshynyń aiaǵyna taǵylatyn radioelektrondyq modýl. Bilezik barlyq qaýipsizdik erejelerine sáikes keledi. Bileziktiń salmaǵy shamamen 80 gramm. Elektrondyq bilezik taǵylǵan adamnyń qai jerde ekenine kóz jetkizý kerek bolsa, dispetcher bir batyrmany basady jáne 5 minýt ishinde bilezik taǵylǵan adamnyń beinesin, daýysyn tekserý týraly habarlama keledi», - deidi ol.
Baǵdarlama barysynda Aslan Qusaiynov elektrondy bileziktiń qandai bolatynyn, onyń qalai qoldanylatynyn kórsetti.
