Sýret: ashyq derekkóz
«Jasyl Damý» AQ basqarma tóraǵasynyń orynbasary Shynasyl Ernazar ýtilizatsiialyq alymǵa qarsy petitsiia boiynsha qoǵamdyq tyńdaýda ýtil alymnan túsken qarajat qaida jumsalyp jatqanyn aitty, dep habarlaidy "Ult aqparat" Ozgeris.info basylymyna silteme jasap.
Spikerdiń sózinshe, 2022-2023 jyldary jeńildetilgen avtonesieleý, aýyl sharýashylyǵy tehnikasynyń lizingin qarjylandyrýǵa 180 milliard teńge bólindi.
"Qoqys óńdeý jáne suryptaý zaýyttaryn salýǵa, orman mekemeleri úshin arnaiy tehnika satyp alýǵa qosymsha 200 milliard teńge bólý josparlanyp otyr. Sondai-aq qosymsha 90 milliard teńgeni kózdeitin túzetýler engiziledi. Bul qarjy Sý resýrstary ministrliginiń, orman mekemeleriniń jáne avtobýs satyp alýdyń qajettilikterine baǵyttalady. «Ónerkásipti damytý qory» AQ arqyly qaitarymdy negizde bólinýi josparlanyp otyrǵan 470 milliard teńgege toqtalsaq, onyń 185 milliard teńgesi zaýyttarǵa jumsalady. Búkil Qazaqstan boiynsha jylyna jalpy qýaty 3 million tonna qaldyqtardy suryptaityn 21 jeli, qaita óńdeý boiynsha 45 zaýyt salynyp, 223 arnaiy tehnika satyp alynady", — dedi «Jasyl Damý» AQ basqarma tóraǵasynyń orynbasary.
Shynasyl Ernazar «Jasyl damý» baǵdarlamasy boiynsha qarjy bólinip, 13 347 otbasy jeńildetilgen avtonesieleý arqyly jańa kólik satyp alǵanyn aitty.
"Biyl sý tasqynyna bailanysty tótenshe jaǵdailar ministrligi men sý resýrstary jáne irrigatsiia ministrligin qajetti tehnikamen jaraqtandyrý úshin Ónerkásipti damytý qory arqyly qosymsha 50 milliard teńge bólý josparlanǵan. Avtobýstarǵa kelsek, avtobýstardyń jeńildetilgen lizingine 45 milliard teńge bólý josparlanyp otyr, oǵan 1100-ge jýyq jańa avtobýs satyp alynady. Osyǵan deiin bólingen qarajatqa jylyna úsh millionnan astam jolaýshyǵa qyzmet kórsetetin 349 jańa avtobýs satyp alyndy", — dedi ol.
Budan basqa órt sóndirýshiler orman órtterin sóndirýdiń jedeldigin qamtamasyz etý úshin jańa mashinalar alady, bul maqsatqa 40 mlrd teńge bólý josparlanǵan.
