«Əleýmettik meditsinalyq saqtandyrý qory» KEAQ basqarma tóraǵasy Aibatyr Jumaǵulov ústemeaqy men syiaqy alatyn meditsina mamandarynyń tizimi qalai jasalatynyn aityp berdi, dep habarlaidy QazAqparat.
«Ústemeaqynyń respýblikalyq biýdjet qarajaty esebinen alynatynyn aitqym keledi. Qyzmetkerlerge syiaqy berý sheshimin Densaýlyq saqtaý ministrligi men jedel shtab janynan qurylǵan óńirlik komissiialar qabyldaidy. Al qor komissiia bergen tizim boiynsha qarajat bóledi», - dedi Aibatyr Jumaǵulov Ortalyq kommýnikatsiialar qyzmetinde ótken brifingte.
Onyń aitýynsha, komissiia quramyna oblys basshylyǵy, densaýlyq saqtaý basqarmasy jáne qor filialynyń ókilderi kiredi.
«Sheshim qabyldaýda komissiia óńirdegi epidemiologiialyq jaǵdaidy, epidemiiaǵa qarsy sharalar sipatyn eskeredi. Meditsinalyq uiym basshysy infektsiia juqtyrý qaýpin rastaityn negizdemeler boiynsha, mamandardyń laýazymy men jumys istegen saǵaty bar tizim usynady. Komissiia olardy qaýip-qater toptaryna bóledi», - dep atap ótti spiker.
Sonymen birge, komissiia syiaqy berý úshin koronavirýs infektsiiasyn juqtyrý qaýpi bar tulǵalardyń qosymsha tizimin usyna alady.
«Iaǵni, shtab janyndaǵy komissiia qaýip tobyna kirmeitin mamandarǵa syiaqy taǵaiyndai alady. Biraq, bul jaǵdaida qarajat meditsinalyq uiymnan, jergilikti biýdjetten nemese demeýshilik kómekten alynady. Qor meditsinalyq uiymdardyń ýaqytynda tólem jasaýy úshin avans túrinde boljanǵan somany jiberedi. Keiin tólengen ústemeaqylar týraly aqparatty kommisiia qorǵa jiberip otyrady», - dedi qor basshysy.
