Qyrǵyzstannyń eks-prezidenti Almazbek Atambaevtyń burynǵy keńesshisi men Atambaevty qoldaityn Qyrǵyzstan sotsial-demokratiialyq partiiasynyń (QSDP) múshesi Kýndýz Joldýbaeva Koi-Tash aýylyndaǵy qaqtyǵysqa bailanysty ekinshi ret tergelgen. Bul týraly advokat Zamir Jooshev habarlady, dep jazady Azattyqtyń Qyrǵyz qyzmeti.
Advokattyń sózinshe, kýáger retinde tergeýge burynǵy prezidenttiń uly Seitek Atambaev ta shaqyrylǵan. Jooshev Koi-Tashtaǵy oqiǵa kezinde Atambaev ulynyń "aiaǵy synyp, qoly jaralanǵanyn" aitady.
Buǵan deiin áleýmettik jelilerde Seitek Atambaevtyń ustalyp, tergeýge jetkizilgeni týraly video taraǵan. Keiinnen Qyrǵyzstan ishki ister ministrligi Atambaev ulynyń kýáger retinde shaqyrylǵanyn, quqyq qorǵaý organdary ony ustamaǵanyn habarlady.
Buǵan deiin Jogorký Kenesh (Qyrǵyzstan parlamenti) depýtattary Asel Kodýranova men Irina Karamýshkinanyń, Koi-Tashtaǵy operatsiia kezinde Atambaevty qoldaǵan oppozitsiialyq saiasatker Ravshan Jeenbekovtiń tergeýge shaqyrylǵany habarlanǵan. QSDP-nyń resmi ókili Kýndýz Joldýbaeva Azattyqtyń Qyrǵyz qyzmetine "eki depýtattyń birneshe saǵat tergeýden soń bosap shyqqanyn, Atambaevtyń basqa jaqtastary tergeýge shaqyrylyp jatqanyn" aitty.
7 tamyzda bastalǵan Atambaevty ustaý operatsiiasy arnaiy jasaq pen eks-prezident jaqtastarynyń qaqtyǵysyna ulasyp, bir áskeri qaza tapqan. Ondaǵan adam jaraqattandy. Arnaiy jasaqtyń alty sarbazyn burynǵy prezidenttiń jaqtastary kepilge alyp, erteńine bosatqan. Atambaev 8 tamyzda jalǵasqan operatsiia kezinde óz erkimen bilikke berildi. Oǵan jemqorlyq aiyby taǵylyp, eks-prezident 26 tamyzǵa deiin qamaýǵa alyndy. Qazir onyń isi tergelip jatyr.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady. Úsh ret shaqyrtý jibergenimen tergeýge barmaǵan Atambaevty ministrlik arnaiy operatsiia júrgizip, kúshtep ákelýdi tapsyrǵan.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Prokýratýra Atambaev qylmystyq toptar arasynda tanymal Aziz Batýkaevtyń zańsyz bosatylýymen bailanysty iste kýáger retinde tanylǵanyn málimdegen.
Atambaev bul aiyptardyń bárin joqqa shyǵaryp, ózin tergeýge shaqyrýdyń saiasi astary bar dep málimdegen. Ol Aziz Batýkaevty bosatýǵa qatysy joǵyn da aitqan. Atambaev Qyrǵyzstandy 2011-2017 jyldary basqarǵan. Onyń ornyna bilikke 2017 jyldyń sońynda sailaý jolymen Sooronbai Jeenbekov kelgen.
