Almatyda áýe apatynyń jalǵyz kýágeri – ushqysh Meiirjan Moldaqulovtyń denesi jer qoinyna tapsyryldy. 54 jastaǵy azamatty aqtyq saparǵa áriptesteri, dostary men jaqyndary shyǵaryp saldy.
Qaraly jiynǵa qatysqandar marqumdy óz isin súietin eńbekqor ári aqkóńil adam bolǵan dep eske aldy, – dep habarlady KTK.
"Mektepten soń Aqtóbeniń ushqyshtar ýchilishesin bitirgen. Sodan ushqysh boldy. Almatyda qansha jyldan beri ushqysh bolyp istegen. Jumysyn qatty jaqsy kóretin. Otbasyna adal, bala-shaǵasyna qaraityn. Jora-joldasqa da adal jigit boldy", - deidi Moldaqulovtyń synyptasy Nurjamal Qasymova.
Meiirjan Moldaqulov ushaq apatynan keiin basynan, jambasy men omyrtqasynan aýyr jaraqat alǵan. Keiin oǵan birneshe ota jasalyp, dárigerler ushqyshty úiine jibergen bolatyn. Alaida aýrýhanadan jazylyp shyqqan azamat arada apta ótpei qaitys boldy. Marqumnyń artynda jubaiy men eki qyzy qaldy.
Bul otbasyna Bek Air tarapynan kómek kórsetile me, ol jaǵy ázirge belgisiz. Kompaniia basshysy Nurlan Jumasultanov suraq qoiǵan tilshilerdi iterip, aldy-artyna qaramai tura qashty.
